“Bakı Təşəbbüs Qrupunun və Azərbaycanın neokolonizmdən əziyyət çəkən xalqlara dəstəyini yüksək qiymətləndiririk”.
Bunu “Tavini Huiraatira” Partiyasının Baş katibi Viktor Maamaatuaiahutapu Milli Məclisdə keçirilən mətbuat konfransında bildirib.
“Əlbəttə ki, Bakı Təşəbbüs Qrupu təkcə bizə, bizim ölkəmizə yox, müstəmləkə şəraitində yaşayan ölkələrə dəstək verir. Mən hesab edirəm ki, bu təşəbbüslərin tez bir zamanda nəticə verməsi üçün onlar mütləq şəkildə davam etdirilməlidir. Hazırda dünyada müstəmləkəçilikdən əziyyət çəkən bir çox ölkə var. Bakı Təşəbbüs qrupunun həmin xalqlara dəstəyini son dərəcə yüksək qiymətləndiririk. Hesab edirik ki, bu dəstək yaxın zamanda öz bəhrəsini verəcək”.
Konfransda bildirilib ki, Bakı Təşəbbüs Qrupu çərçivəsində Azərbaycanla tərəfdaşlığı genişləndirmək üçün səmərəli işlər görüləcək.
O, həmçinin Bakıda keçiriləcək BMT-nin İqlim Dəyişikliyi üzrə Çərçivə Sazişinin Tərəflər Konfransı – COP29-un əhəmiyyətindən danışıb:
“Belə bir məlumatımız var ki, COP29-da kiçik ada dövlətlərinin iştirakı ilə bağlı danışıqlar başlanılıb. Biz də öz növbəmizdə çalışacağıq ki, bu mühüm konfransda iştirak edərək qlobal səviyyədə ətraf mühitin qorunması təşəbbüslərinə öz töhfəmizi verək. Ümid edirik ki, buna nail ola biləcəyik”.
Baş katib ölkəmizin dəstəyinin onlar üçün böyük əhəmiyyət daşıdığını söyləyib.
