Əhməd Oruc: "Məhkəmənin qərarı ilə bağlı kasasiya şikayəti veriləcək"
Ədliyyə Nazirliyinin Azadlıq Partiyasının ləğv edilməsi üzrə müraciəti əsasında məhkəmə prosesi keçirilib. Bakı Apellyasiya Məhkəməsində hakim Ceyhun Məmmədovun sədrliyi ilə keçirilən prosesdə qərar qəbul edilib. Qərara əsasən, müraciət təmin olunub və partiyanın fəaliyyətinin dayandırılması barədə qərar qəbul olunub. Qeyd edək ki, Azadlıq Partiyası 2005-ci ildə dövlət qeydiyyatına alınıb. Partiya ötən il Ədliyyə Nazirliyi tərəfindən qeydə alınmayıb. Ləğv olunmuş partiyanın sədri Əhməd Orucdur.
Partiyanın məhkəmə qərarı ilə ləğv edilməsinə münasibət bildirən Əhməd Oruc "Şərq"ə açıqlamasında deyib ki, sənədləri Ədliyyə Nazirliyinə 1 il 4 ay bundan öncə təqdim ediblər. Onun sözlərinə görə, Nazirlik əvvəlcə sənədlərin yerində olduğunu və partiyanın qurultaya hazırlıq görə biləcəyini açıqlayıb. Lakin sonradan təşkilatın özünü buraxması məsələsi gündəmə gəlib. Rəhbərlik isə bununla razılaşmayıb və partiyanın özünü buraxmayacağını bildirib:
"Ötən müddət ərzində Ədliyyə Nazirliyi rəsmi heç bir məlumat vermədi. Halbuki uzağı, bir aya cavab verilməliydi. Guya o zaman təqdim etdiyimiz üzvlərin siyahısını müəyyənləşdirmək mümkün olmayıb. Bu kimi arqumentlərlə məhkəməyə müraciət olunub. Bir günün içində Apellyasiya Məhkəməsi Azadlıq Partiyasının qapadılması ilə bağlı qərar qəbul etdi. Ancaq biz fəaliyyətimizi davam etdirmək fikrindəyik. Məhkəmənin qərarı ilə bağlı kasasiya şikayəti veriləcək".
Ə.Oruc vurğulayıb ki, partiyanın olub-olmaması onun siyasi fəaliyyətini dayandıra bilməz: "Partiya sədri olmaq mənə heç bir üstünlük vermirdi. Həm maddi, həm də digər imkanlar baxımından adi insanlardan fərqsiz olmuşuq. Sadəcə, burada təqdimat məsələsi var. İndiyə kimi "Azadlıq Partiyasının sədri Əhməd Oruc" kimi təqdim edirdilər. İndi də "qeydiyyatı ləğv olunmuş Azadlıq Partiyasının sədri" kimi təqdim edəcəklər".
