Erməni xalqı dilənçi günündədir: "Qarabağ münaqişəsi həll olunmadan sosial səfalət hökm sürəcək"

Turan 13:20 25.07.2019 Siyasət 798

“Görünüşdə xalqın “tələbi” ilə hakimiyyətə gələn Nikol Paşinyanın əslində Qərbin dəstəyi ilə hakimiyyətə gəlməsi heç kimə sirr deyil”. Bunu “Sherg.az”a açıqlamasında BAXCP sədrinin müşaviri, politoloq Azər Qasımov deyib.
Deputat bildirib ki, Paşinyanın verdiyi vədləri yerinə yetirməsi ilk baxışda ona asan gəlirdi:
“Paşinyan küçə təfəkkürlü insandır və onun siyasətçi kimi heç bir potensialı yoxdur. Məlum olduğu kimi regiondakı ən böyük səfirlik ABŞ-ın Ermənistandakı səfirliyidir. Bu “böyüklük” Ermənistana maraqdan yox, regiona maraqdan irəli gəlir. Amerikanın bölgəmizdə strateji maraqları var. Əsas marağı isə Azərbaycanın enerji qaynaqları və bu qaynaqları Avropaya, İsrailə çatdıran boru kəmərləridir. Bu baxımdan regionda konfliktin olmasını istəmir. Paşinyan ilk vaxtlar Qərbin dəstəyini alsa da, sonradan onların istəklərini yerinə yetirmək potensialında olmadığını dərk etdi. Ona görə də Vaşinqton İrəvana maddi yardım etmir və hətta illik yardımı da azaldır. Halbuki Azərbaycana edilən yardım dəfələrlə artırılıb. Bu il Azərbaycana 100 milyon dollar yardım ayrılıb”.
Analitikin sözlərinə görə, bununla ABŞ İrəvana və ermənilərə mesaj verir ki, əgər Ağ Evin strateji maraqlarına təhlükə yaratsanız vəziyyətiniz daha da pis olacaq:
“Dağlıq Qarabağ münaqişəsi həll edilmədən və işğala son qoyulmadan ermənilərin sosial durumu düzəlməyəcək. Ermənistan əhalisi yardımlar hesabına yaşayır. Paşinyan Qarabağ münaqişəsində nəzərə çarpacaq dəyişikliyə nail olmalıdır, əks halda onun da axırı digərləri kimi olacaq. Amma biz məsələyə sadəlövh yanaşmamalıyıq. Amerika və ya başqa dövlət bizim yerimizə münaqişəni həll etməyəcək. Ən məqbul yol Azərbaycan xalqının müharibə yolu ilə öz torpaqlarını azad etməsidir. Bu yol Azərbaycan xalqına da baş ucalığı gətirər!”.