Ermənistan Xarici İşlər Nazirliyinin (XİN) Laçın yolunda etirazlar ilə əlaqədar 3 yanvar 2023-cü il tarixli növbəti bəyanatı tamamilə əsassızdır. Bu bəyanat beynəlxalq tərəfdaşlar arasında məsələ ilə bağlı çaşqınlıq yaratmaq və vəziyyəti süni gərginləşdirmək məqsədi daşıyır”. Bu barədə Xarici İşlər Nazirliyinin Mətbuat xidməti idarəsinin Ermənistan Xarici İşlər Nazirliyinin 3 yanvar 2023-cü il tarixli bəyanatına dair şərhində bildirilib.
Azərbaycan XİN-i Ermənistanı siyasi və hərbi təxribatları dayandırmağa çağırıb.
Ermənistan tərəfinin hər zaman təxribat törətdiyini deyən hərbi-siyasi ekspert Həşim Səhrablı "Sherg.az"a söyləyib ki, onların əməlləri təkcə diplomatik müstəvi ilə də yekunlaşmır:
"Rəsmi İrəvanın təxribatlarındakı əsas məqsəd, Ermənistan tərəfinin 2020 - ci il savaşında məğlub olması və Azərbaycanın dünya siyasətində nüfuzunun getdikcə artması qorxusudur. Onlar ehtiyat edərək Cənubi Qafqazdakı prosesləri uzatmağı hədəfləyirlər. Çünki indiki məqamda sülhün imzalanması və beynəlxalq səviyyəli layihələr birbaşa Azərbaycanın diqtəsi ilə həyata keçiriləcək. Bu isə Ermənistanın milli maraqlarını sıradan çıxara bilər. Bu səbəblə də rəsmi İrəvan prosesləri maksimum dərəcədə uzatmağı düşünür. Uzun müddətdə heç kim nələrin baş verəcəyini bilmədiyi üçün, onların Azərbaycana qarşı koalisiya yarada bilmək ümidləri var".
Analitik əlavə edib ki, Ermənistanın çağırışlarımızı diqqətə alması üçün onları məcbur etməliyik:
"Bu məcburiyyət hərbi gücün istifadəsindən keçir. Rəsmi Bakının atdığı son addımlar da belə bir məqsədin mövcudluğundan xəbər verir. Bu o demək deyil ki, Azərbaycan genişmiqyaslı əməliyyatlara başlayacaq. Amma istənilən halda güc nümayiş etdirməklə, istədiyimiz nailiyyətləri əldə etməyi nəzərdən keçirməliyik. Ümumiyyətlə, 2023-cü ildə bir sıra ciddi dəyişikliklərlə qarşılaşacağıq. Bu dəyişikliklər Cənubi Qafqazda da baş verə bilər".
