Ukrayna daxilində döyüş əməliyyatları ilə bağlı müəyyən fikir ayrılığının olduğu nəticəsi çıxır
Ukraynanın daxili işlər naziri Denis Monastırskinin və müavininin də həlak olduğu helikopter qəzasının səbəbləri araşdırılır. Lakin qəzanın təxribat olması versiyası da istisna edilmir. Bu hadisənin Qərb mediası tərəfindən Rusiyada “hibrid müharibəsinin banisi” adlandırılan Gerasimovun Ukraynadakı hərbi qüvvələrə baş komandan təyin olunmasından sonra baş verməsi diqqət çəkir. Gerasimovun əməliyyatlara paralel olaraq, təxribat ssenarilərindən istifadə edəcəyi gözləniləndir.
Bu kontekstdə Ukrayna Daxili İşlər Nazirliyi rəhbərliyinin olduğu helikopterin qəzaya uğraması suallar yaradır. Eyni zamanda bir neçə gün öncə Aleksey Arestoviçin Dneprdəki hücumda Ukrayna hava hücumundan müdafiə qüvvələrini günahlandırması, ardınca “səhv etdiyini” deyərək, istefa verməsini diqqətə gətirir.
Siyasi şəhrçi Asif Nərimanllı deyib ki, Arestoviçin ittihamı “texniki səhv” deyildi. Analitikə görə, onun istefadan sonra dediyi iki ifadəsi diqqət çəkdi:
"Arestoviçin "ötən dəfə gedəndən ay yarım sonra müharibə başladı. Bu dəfə görək nə olacaq”, yaxud, "nə qədər ki, müharibə gedir, tam dəstək verəcəm, müharibədən sonra baxacağıq” sözlərindən Ukrayna daxilində döyüş əməliyyatları ilə bağlı müəyyən fikir ayrılığının olduğu nəticəsi çıxır. Hərçənd müharibənin getdiyi vaxt bu, o qədər də anormal hal deyil. "Hibrid müharibəsinin banisi” Gerasimov komandan təyin olunur. Arestoviç Ukraynanı ittiham etdikdən sonra istefa verir və “bu dəfə gedəndən sonra nə olacaq” kimi müəmmalı fikirlər səsləndirir. Ardınca nazirin də olduğu helikopter qəzaya uğrayır. Bu məqamlar fonunda suallar yaranır. Qəza rusların sui-qəsdi ola bilərmi? Elədirsə, Ukrayna ordusunda Rusiyaya bağlı şəbəkənin ola bilməsi ehtimalı nə qədər mümkündür?!".
