NATO bundan istifadə edərək Ermənistanda əsaslı şəkildə yerləşmək planları cızır
"NATO-nun Ermənistanla əməkdaşlığa cəlb edilməsi Rusiya faktorunun zəiflədilməsinə hesablanıb".
Bu barədə "Sherg.az"a açıqlamasında politoloq Azər Qasımov deyib. Analitik düşünür ki, Ermənistan hazırda NATO üçün Cənubi Qafqaz regionunda zəif bənd rolunu oynayır:
"NATO bundan istifadə edərək Ermənistanda əsaslı şəkildə yerləşmək planları cızır. Erməni şərhçilərin "təhlükəsizlik yastığı" hesab etdikləri NATO-nun məqsədi başqadır. Bu, Rusiyanın başını qatmaq üçün növbəti qurbanın - Ermənistanın başının altına yastıq qoyulmasıdır. NATO Ermənistana Ukraynaya verdiyi vədlərdən verir. Hərbi Alyans kənardan cəlbedici görünür. Xüsusən öz təhlükəsizliyini başqa yerdə axtaran dövlətlər üçün daha cazibədardır. Ermənistana NATO rəsmilərinin səfərləri də şirin vədlər üçündür. NATO Ermənistana hərtərəfli dəstək vədi ilə Rusiyanın regional təsirlərini zəiflətmək istəyir. NATO-Rusiya qarşıdurması fonunda bölgə ölkələrinin siyasi elitasında hərbi alyansa etimad mühitinin artırılması və Rusiyaya qarşı dəstəyin real olması məsələsində Cənubi Qafqaz ölkələrini inandırmaq vacib məsələdir. Təşkilat rəsmisinin Ermənistana səfəri də bu məqsədə xidmət edir".
Qeyd edək ki, son günlər Qərb və NATO rəsmilərinin Ermənistana ardıcıl səfərləri baş tutur. Ötən gün NATO baş katibinin Qafqaz və Mərkəzi Asiya üzrə xüsusi nümayəndəsi Xaviyer Kolomina Ermənistana səfər edib. Tərəflər Ermənistan-NATO əməkdaşlığı, həmçinin regional və beynəlxalq təhlükəsizliklə bağlı məsələləri müzakirə ediblər. Ermənistan Baş naziri Nikol Paşinyan Cənubi Qafqazda təhlükəsizlik vəziyyətinə, Ermənistan-Azərbaycan münasibətlərinin normallaşdırılması prosesində baş verən son hadisələrə və əvvəlcədən razılaşdırılmış aydın prinsiplərə əsasən sülh prosesinə toxunub. Bir sıra ekspertlərin qənaətincə, NATO-nun Ermənistana səfərinin əsas məqsədi İrəvanı Rusiyadan tamamilə qoparmaqdır.
