Fransa səfirinin XİN-ə çağırılması ciddi siqnaldır
Parisin cəhdləri Ermənistanın da bir dövlət kimi bundan sonra mövcud olmasını sual altında qoyur
Dünən Fransanın Azərbaycandakı səfiri Ann Buayon Xarici İşlər Nazirliyinə çağırılıb. Görüş zamanı, COP29 ərəfəsində və sessiya zamanı Fransanın Azərbaycan sədrliyinin hədəf alınmasına etiraz bildirilib. Mötəbər tədbirin boykot edilməsinə çağırışların, bir çox dövlət başçılarının tədbirə qatılmamağa təşviq edilməsinin qəbuledilməz olduğu vurğulanıb. Eləcə də COP29 konfransı başlayan zaman Fransanın xüsusi səyləri ilə Avropa Parlamentində sədrliyimizi əsassız şəkildə tənqid edən, ümumilikdə isə iqlim dəyişmələri ilə mübarizə sahəsində qlobal səylərimizə qarşı çevrilmiş qətnamənin yolverilməz olduğu vurğulanıb.
Bundan başqa səfirin diqqətinə Ermənistanın geniş şəkildə silahlanmasını həyata keçirən, militarizmi və revanşizmi təşviq edən Fransanın addımlarının sülh prosesinə zərbə olduğu çatdırılıb. Azərbaycanı hədəf alan, eləcə də normallaşma prosesini təhlükə altına salan bu addımlara son qoyulması Fransa tərəfindən təkidlə tələb olunub.
Millət vəkili Hikmət Babaoğlu "Sherg.az"a bildirib ki, hazırda Fransanın rəhbərlik etdiyi bir marginal Qərb mərkəzi var və bu mərkəz Azərbaycana qarşı bütün parametrlər üzrə müharibə elan edib. Deputatın sözlərinə görə, Fransanın rəhbərlik etdiyi marginal mərkəzə Avropada yalnız islamofob və ermənipərəst dairələr daxildir:
"44 günlük müharibədən ötən dörd il müddətində həm ermənilərə, həm də onların arxasında duran güclərə qarşı virtual müstəvidə və informasiya cəbhəsində mübarizə apaılır. Şübhəsiz ki, buna son qoymağın vaxtı çatıb. Fransanın keçmiş xarici işlər nazirinin də etiraf etdiyi kimi, Parisin Azərbaycana qarşı olan siyasəti, əslində, Fransanın özünə qarşı yönəlib. Ötən dövr ərzində Fransa Azərbaycana qarşı heç nəyə nail ola bilməyib. Azərbaycan isə Sakit Okean adalarından, Şimali Afrikadan tutmuş Fransanın koloniyalarının tələblərini, səslərini bütün dünyaya çatdıra bilib. Bu isə Fransanı daha da marginallaşdırıb. Belə məqamda Bakı COP29-un gedişində bu qərəzli fəaliyyətə son qoyulmazsa, ermənilərin daha pis duruma düşəcəyi, Fransanın beynəlxalq münasibətlər sistemində nüfuzunun daha da aşağı enəcəyi ilə bağlı xəbərdarlıq etdi".
Parlament üzvü bəyan edib ki, Fransa Azərbaycana qarşı təkcə informasiya müharibəsi aparmır, həm də erməniləri var gücü ilə silahlandırmaqla onları yeni müharibəyə hazırlayır: "Bu cəhdlər Ermənistanın da bir dövlət kimi bundan sonra mövcud olmasını sual altında qoyur. Məhz bu strateji düşüncənin izah edilməsi baxımından Fransa səfirinin Azərbaycan Xarici İşlər Nazirliyinə çağırılması və prosesin Ermənistan üçün hansı fəsadlara gətirə biləcəyinin izah edilməsi baxımından da olduqca əhəmiyyətlidir".
