Makron hökumətinin Ermənistana tədarük etdiyi silahlar hücum silahlarıdır, öldürücüdür və Azərbaycan üçün praktiki təhlükə yaradır. Bu barədə Prezident İlham Əliyev “Rossiya Seqodnya" Beynəlxalq İnformasiya Agentliyinin Baş direktoru Dmitri Kiselyova müsahibəsində bildirib. Dövlət başçısı deyib ki, Ermənistanla sərhədimizin uzunluğu min kilometrdən çox olduğunu, bir çox yaşayış məntəqələrinin sərhədə yaxın yerləşdiyini və bu yaşayış məntəqələrinin əksəriyyətinə keçmiş köçkünlərin qayıtdıqlarını nəzərə aldıqda, təbii ki, biz bu prosesi yalnız kənardan müşahidə edə bilmərik. Prezident söyləyib ki, biz dəfələrlə Ermənistana və onun ABŞ Dövlət Departamentindəki himayədarlarına çatdırmışıq ki, buna son qoyulmalıdır. Amma təəssüf ki, bizim səsimiz eşidilmir, Ermənistanın silahlanması prosesi sıçrayışla gedir.
Cross Media Təhlil Mərkəzinin analitiki, siyasi şərhçi Mübariz Göyüşlü “Sherg.az”a bildirib ki, Azərbaycan Prezidenti İlham Əliyev növbəti dəfə həyacan təbili çalaraq qarşı tərəfə hümanistlik göstərir:
“Eyni zamanda bu başda Fransa olmaqla Ermənistanı silahlandıranlara bir mesajdır. Ermənistan və onun havadarları yaxşı bilirlər ki, İlham Əliyevin xəbardarlıqları yalnız sözdən ibarət deyil və onun arxasında mühim əməllər dayanır. Ermənistan həmin xəbardarlıqlara əhəmiyyət vermədiyi üçün bir neçə dəfə ağır zərbələr alıb. Düşünürəm ki, İlham Əliyevin xəbərdarlıqlarına qarşı tərəf əməl etməli və silahlanmaya son qoyulmalıdır. Çünki Ermənistanın raketlər və hücum silahları ilə silahlanması növbəti dəfə təxribata hazırlaşmasının göstəricisidir. Fransa Ermənistanı belə silahlandırmaqla onu proseslərdə qızışdırmağa çalışır. Amma belə davranışlar və hərəkətlər Azərbaycan üçün keçərli deyil. Azərbaycanın hərbi cəhətdən potensialı çox güclüdür. Azərbaycanın güclü ordusu və uzaqgörən dövlət başçısının çağırışlarına Ermənistan diqqətlə yanaşmalıdır. Ermənistanın silahlanmasına beynəlxalq ictimaiyyət də səsini çıxarmalıdır. İlham Əliyevin çağırışı həm də bölgədə sülh və sabitlik çağırışı hesab edilir”.
