Azərbaycanın yaşıl enerji gündəliyi ölkənin dayanıqlı inkişaf strategiyasının əsas tərkib hissələrindən biridir. Bu siyasət, həm ekoloji təhlükəsizliyi təmin etməyə, həm də iqtisadiyyatın diversifikasiyasına töhfə verməyə yönəlib. Azərbaycan bərpa olunan enerji mənbələrinin inkişafı sahəsində konkret hədəflər müəyyən edib. Bu məqsədlə, 2027-ci ilə qədər ölkədə 2 giqavat həcmində günəş və külək elektrik enerjisi istehsalı planlaşdırılır. Bu hədəflərə çatmaq üçün Azərbaycan beynəlxalq əməkdaşlıq və müasir texnologiyaların tətbiqi sahələrinə xüsusi önəm verir. Bu kontekstdə Çin ilə əlaqələrin inkişaf etdirilməsi mühüm əhəmiyyət kəsb edir. Çin, hazırda dünyada bərpa olunan enerji texnologiyalarının, xüsusilə günəş panelləri və külək turbinlərinin istehsalında aparıcı ölkələrdən biridir. Çinin bu sahədəki zəngin təcrübəsi və qabaqcıl texnologiyaları Azərbaycanın yaşıl enerji sektorunda irəliləməsinə ciddi töhfə verə bilər. Beləliklə, Azərbaycan-Çin əməkdaşlığı yaşıl enerji sektorunun inkişafında strateji bir addım olmaqla yanaşı, ölkənin ekoloji və iqtisadi davamlılığına da mühüm töhfə verəcək. Bu tərəfdaşlıq çərçivəsində həyata keçiriləcək layihələr Azərbaycanın enerji müstəqilliyini möhkəmləndirəcək və onu regional yaşıl enerji mərkəzlərindən birinə çevirəcək.
Millət vəkili Vüqar Bayramov “Sherg.az”a söyləyib ki, Azərbaycan regionda yaşıl enerjiyə ən çox investisiya cəlb edən ölkələrdən biridir:
“Son illər yaşıl enerji istehsalına 1 milyard dollardan artıq xarici investisiya cəlb olunub. Həm günəş, həm də külək enerjisindən intensiv şəkildə istifadə edilir. Bu isə Azərbaycan üçün yeni ixrac imkanları deməkdir. Digər tərəfdən Azərbaycan, Gürcüstan, Rumıniya və Macarıstan regionun alternativ mənbədən əldə edilən yaşıl enerjisinin Avropa bazarlarına nəqliylə bağlı razılıq əldə ediblər. Güman edilir ki, 2027-ci ildən etibarən Azərbaycan və bütövlükdə regionun yaşıl enerjisi Avropa bazarlarına çıxarıla bilər. Sözsüz ki, Azərbaycan, Qazaxıstan və Özbəkistan arasındakı əməkdaşlığı da xüsusilə qeyd etmək lazımdır. Çünki bu təkcə Azərbaycan və Gürcüstanın deyil, Mərkəzi Asiya ölkələrinin yaşıl enerjisinin də Avropa bazarlarına nəqli deməkdir. Eyni zamanda Çin dünyada ən çox yaşıl enerji istehsal edən ölkələrdəndir. Bu istiqamətdə Çin və Azərbaycan əməkdaşlığının güclənəcəyi də gözlənilir. Çin investorlarının Azərbaycanda həyata keçirilən yaşıl enerji layihələrinə cəlb edilməsi ilə bağlı danışıqlar aparılır. Bu, iqtisadi əməkdaşlığı gücləndirərək yeni iş yerlərinin yaradılmasına və texnoloji inkişafın sürətlənməsinə səbəb olacaq. Amerika, Azərbaycan və Çin arasında strateji əməkdaşlıq var. Strateji əməkdaşlıq birmənalı şəkildə ölkələr arasında münasibətlərin cəmləşməsinə, yaşıl enerji daxil olmaqla fərqli istiqamətlərdə yeni əməkdaşlıq platformasının qurulmasına şərait yaradır”.
