Rus bölmələrində Azərbaycan dilinin dərs saatlarının artması ilə yanaşı hələ gələcəkdə ədəbiyyat dərsləri də Azərbaycan dilində keçiriləcək”.
Bu sözləri Elm və təhsil naziri Emin Əmrullayev brifinqdə söyləyib.
“Azərbaycan vətəndaşları niyə Səməd Vurğunu, Nəsimini rus dilində öyrənməlidirlər ki? Səməd Vurğunun şeiri elə Azərbaycan dilində öyrənilməlidir. O ki, qaldı Azərbaycan tarixini rus dili bölməsində təhsil alan şagirdlərin öyrənə bilməməsi, burada günah bizdə deyil”, – deyə o qeyd edib.
Nazir diqqətə çatdırıb ki, Azərbaycan tarixi bizim milli kimliyimizdir.
Sabiq təhsil naziri, filoloq-alim, professor Firudin Cəlilov "Sherg.az"a deyib ki, rus dilli məktəblər 30-40 il bundan qabaq yaxşı idi:
“Həmin məktəblər Azərbaycan məktəblərindən fərqlənirdi. Çünki onların dərslik proqramları Moskvada hazırlanıb göndərildi. Rus sektorunda oxuyan uşaqlar intellektual baxımdan da seçilirdi. Lakin bu əlaqələr qırıldıqdan sonra artıq Azərbaycanda rus dili müəllimi, hazırlamaq imkanları azaldı. Rus məktəblərində tədris çox aşağı düşdü. Ona görə də hazırda qəbul imtahanlarının nəticələrinə baxsaq ən az bal yığan rus məktəbini bitirənlərdir. Əvvəlki səviyyədə olan rus məktəbləri indi yoxdur. İndi uşaqları rus məktəblərində oxutmaq nöqsanlıdır və ehtiyac yoxdur. Təhsil Naziri Emin Əmrullayev bildirib ki, Azərbaycan türkcəsinə aid dərslərin sayını artıracağıq. Bu addımı atsalar əlbəttə, yaxşı olacaq. Rus dilini öyrənməkdə bir problem yoxdur. Amma öyrənmək üçün rus məktəbində təhsil almaq vacib deyil. Rus dili xarici dil kimi 30-40 il də lazım olacaq. Çünki elmi əsərlərin, kitabların və digər qaynaqların çoxu rus dilindədir. Onlar Azərbaycan dilinə tərcümə edilməyib. Amma bu o demək deyil ki, rus məktəblərinin sayını artırmaq lazımdır. Əksinə, rus məktəbləri Bakıda, Sumqayıtda və Gəncədə, bir-iki dənə olsa kifayətdir. Çünki Azərbaycanda elə xalqlar var ki, onlar övladlarını rus məktəblərinə göndərirlər. Onlar üçün rus məktəblərinin olması vacibdir. Respublika üzrə maksimum 8-10 rus məktəbi yetərlidir. Amma indi 250 məktəb var və buna da ehtiyac yoxdur”.
