Azərbaycan, Türkmənistan və Özbəkistan ticari-iqtisadi sahədə üçtərəfli əməkdaşlığı dərinləşdirməyi qarşılarına məqsəd qoyublar. Üç ölkənin liderləri Türkmənbaşıda keçirilən görüşdə bu barədə razılığa gəliblər.
Teleqraf xəbər verir ki, bu barədə “Respublika Meydanı” Teleqram kanalı (Ermənistan) yazıb.
Kanal bildirib ki, tərəflər üç ölkənin tranzit potensialından istifadə edərək, Çindən Yaxın Şərq və Avropaya uzanan dəhlizin yaradılması barədə razılaşıblar:
Mənbə qeyd edib ki, 2024-cü ildə Türkmənistanla Azərbaycan arasında ticarət dövriyyəsi 400 milyon dollara çatıb, Azərbaycan Mərkəzi Asiya və Türkiyə arasında – türk dünyasını birləşdirən dəhlizə çevrilir:
“Azərbaycan öz logistik imkanlarını genişləndirmək, qaz kəmərləri, yollar, hava limanları tikmək, Bakı limanının tranzit imkanlarını genişləndirmək üçün onilliklər ərzində milyardlarla dollar sərmayə qoyub. Azərbaycan Çin və türkdilli Mərkəzi Asiya üçün Orta dəhlizi “Tramp marşrutu” və ya faktiki olaraq Zəngəzur dəhlizi ilə birləşdirən, həm siyasi, həm də iqtisadi fayda əldə edən tranzit dəhlizinə çevrilmək yolundadır”.
Məqalə müəlliflərinin sözlərinə görə, Azərbaycan Türkiyə və bütün türk cümhuriyyətləri üçün Böyük Turanı birləşdirən körpüdür:
“Beləliklə, Cənubi Qafqazda logistik dəhlizlər uğrunda rəqabət qızışır: Azərbaycan enerji resurslarını Qərbə ixrac etməklə lider ölkə mövqeyini qorumaq istəyir, Ermənistan da özünü gücləndirməlidir”.
Xatırladaq ki, 22 avqust 2025-ci il tarixində Türkmənistanın Türkmənbaşı şəhərində Türkmənistan Xalq Məsləhəti Şurasının sədri Qurbanqulu Berdiməhəmmədov, Azərbaycan Prezidenti İlham Əliyev və Özbəkistan Prezidenti Şavkat Mirziyoyev arasında görüş keçirilib. Sonda üçtərəfli görüşün yekunu üzrə liderlərin 12 bənddən ibarət birgə bəyannaməsi qəbul olunub.
