Paşinyan Qərbə deyir ki, imzalanmış anlaşmanı icra etməyə razıyam
Son dövrlərdə regionda sülh və sabitlik məsələləri gündəmin əsas mövzularından birinə çevrilib. Ermənistandakı siyasi proseslər və bağlanmış müqavilələr, həmçinin bu müqavilələrin icrası ilə bağlı fikirlər geniş müzakirə olunur. Xüsusilə, Ermənistanın Baş Naziri Nikol Paşinyanın bu mövzudakı mövqeyi və verdiyi açıqlamalar, həm daxildə, həm də beynəlxalq aləmdə diqqət çəkir. Paşinyan özünün X sosial şəbəkəsində ABŞ Prezidenti Donald Trampın 8 avqust Vaşinqton görüşü ilə bağlı paylaşımını şərh edərək, Azərbaycanla sülhün daha da institutlaşdırılması istiqamətində işləməyə sadiqliyini təsdiqləyib. O bu tarixi sazişin bağlanmasında vasitəçiliyə görə Donald Trampa təşəkkürünü bildirib və Zəngəzur dəhlizinin həyata keçirilməsinin vacibliyini vurğulayıb.
Politoloq Samir Hümbətov Sherg.az-a 8 avqust müqaviləsindən sonra Paşinyana qarşı artan təziqlərdən danışıb:
"Bu müqavilənin bağlanması Paşinyanın ürəyincə olan mühüm bir məsələsidir. Çünki burada çox ciddi mövzular yer alır. Paşinyan bildirir ki, bu vaxta qədər buna heç kim nail olmayıb. O demək istəyir ki, Ermənistanın əvvəlki rəhbərləri ya buna cəhd etməyiblər, ya da etmək istəməyiblər, bacarmayıblar. Hər halda proses nəticəsiz qalıb. Buna görə də bu, regiona sülh gətirmək baxımından önəmli bir addımdır. Paşinyan Ermənistanın anlaşmadan məmnunluğunu ifadə etmək istəyir. Əslində o, Azərbaycanla işləməyə hazır olduğunu dəfələrlə vurğulayıb. Azərbaycan da bildirir ki, 8 avqust anlaşmasının icrası vacibdir və biz buna sadiqik".
Politoloq Paşinyanın Qərbə mesaj ötürdüyünü bildirib:
"Paşinyan Qərbə deyir ki, imzalanmış anlaşmanı icra etməyə razıyam. Amma Rusiyadan, İrandan və bu məsələdə fərqli mövqedə olan digər güc mərkəzlərindən narazılıq və təzyiq ola bilər. Belə halda, vəziyyəti düzəltmək üçün Qərbin ona köməyi lazım olacaq. Bu, həm də referendum və seçkilərdə özünə beynəlxalq dəstəyi artırmaq məqsədini daşıyır. Bir növ müxalifətə və cəmiyyətə mesaj verir ki, baxın, artıq böyük güclər də bizimlə eyni dalğadadır və eyni mövqedən hərəkət edir. Ona görə də narahat olmayın, biz bu məsələdə doğru addım atmışıq.
Paşinyanı Qarabağ məsələsini bu hala gətirdiyi üçün cəzalandırmaq istəyirlər. Xüsusilə də keçmiş Qarabağ klanının nümayəndələri anlaşmanı tanımayacaqlarını bildirirlər. Buna görə də məsələ çox önəmlidir. Paşinyanın verdiyi açıqlama, xüsusilə Tramp dəhlizi ilə bağlı söylədikləri də bu məqama hesablanıb".
