Ukrayna lideri Volodimir Zelenskinin həyat yoldaşı Yelena Zelenskaya ABŞ-ın birinci xanımı Melaniya Trampla görüşüb.
Publika.az xəbər verir ki, o, bu barədə "Instagram" səhifəsində birlikdə çəkilmiş fotonu paylaşıb.
"Biz ortaq dəyərlərimizi, ilk növbədə uşaqların və onların uşaqlığının qorunmasını müzakirə etdik", - Zelenskaya yazıb.
"Mən ABŞ-ın birinci xanımı Melaniya Tramp ilə görüşdüm. Biz ortaq dəyərlərimizi, ilk növbədə uşaqların və onların uşaqlığının qorunmasını müzakirə etdik.
Xanım Melaniyaya Ukraynaya dəstəyi üçün təşəkkürümü bildirdim, xüsusilə də Rusiyanın Ukraynaya qarşı amansız müharibəsinin qurbanına çevrilmiş uşaqlara göstərdiyi diqqətə görə — o cümlədən uşaqlar üçün sülhün təmin edilməsi ilə bağlı Putinə ünvanladığı məktubuna görə.
Onun bu məsələdə səmimiyyətini, həmçinin dünyanın bütün uşaqlarının rifahına bağlılığını yüksək qiymətləndirirəm.
Mən dəfələrlə vurğulamaqdan yorulmuram ki, yumşaq gücün — insanlığın, empatiyanın və reallığı daha yaxşıya doğru dəyişdirmə qabiliyyətinin təsirinə güclü inanıram. Əminəm ki, ortaq səylərimizlə yardıma ehtiyacı olan bütün uşaqlara kömək edə bilərik.
Melaniya Trampa görüş üçün səmimi təşəkkürümü bildirirəm və dünyanın ən qiymətli sərvəti — uşaqlarımızın qorunması uğrunda gələcək əməkdaşlığı səbirsizliklə gözləyirəm. Bu gün onların müdafiəsi təkcə birgə təşəbbüs deyil, həm də gələcəyimiz naminə ortaq məsuliyyətdir", - Ukraynanın birinci xanımı yazıb.
Bundan əvvəl "New York Post" Amerikanın birinci xanımının baş müşaviri Mark Bekmana istinadla ABŞ Prezidenti Donald Trampın həyat yoldaşı ilə Ukrayna lideri Vladimir Zelenskinin həyat yoldaşı arasında Nyu-Yorkda ikitərəfli görüşün olmayacağını yazmışdı.
