Dövlətin ayırdığı on milyonlarla manat vəsaitin sərfiyyat istiqamətləri dəqiqləşdirilməlidir
“Təhsil sistemində diqqətdən kənarda qalan pillələrdən biri peşə təhsilidir. Buradakı maxinasiyaların həddi-hüdudu yoxdur”. Bunu millət vəkili, təhsil eksperti Etibar Əliyev deyib. Deputat bildirib ki, Peşə Təhsili Dövlət Agentliyinin maliyyə-təsərrüfat fəaliyyətinin Hesablama Palatası tərəfindən yoxlanılması ictimai, sosial və siyasi zərurətdir:
“Dövlətin bu sahənin saxlanılması və inkişafına ayırdığı on milyonlarla manat vəsaitin sərfiyyat istiqamətləri dəqiqləşdirilməlidir.
Mal-materialın faktiki mövcudluğu ilə bağlı inventarizasiya aparılmalıdır. Torpaq sahələri və əmlakın sənədlərə uyğun varlığı yoxlanılmalıdır. Yanacaq və sürtgü yağlarının, təmir və təcrübə materiallarının müəssisələrə faktiki verilmə vəziyyəti araşdırılmalıdır. Peşə təhsili müəssisələri şagirdlərinə dövlət tərəfindən ayrılan təqaüdlərin verilməsində şəffaflıq müəyyən olunmalıdır.
Peşə təhsili müəssisələrində istehsal olunan məhsulların satışından əldə olunmuş vəsaitlərin sonrakı taleyi də dəqiqləşməlidir. Həmçinin, əkilən torpaqların istifadəsinin qanunvericiliyə uyğunluğuna aydınlıq gətirilməlidir”.
E.Əliyev əlavə edib ki, kadrların təyinat meyarları üzrə ixtisas uyğunluğu da yoxlanılmalıdır:
“Bir şəxsin bir neçə müəssisəyə rəhbərlik etməsinin qaranlıq məqsədlərinə aydınlıq gətirilsə yaxşı olar. Son aylarda həbs olunmuş peşə təhsili müəssisələrinin rəhbərləri ilə ortaq məsuliyyət daşıyan, lakin məsuliyyətdən kənarda qalan şəxslərin dairəsi də müəyyənləşməlidir”.
