Rusiya Dövlət Dumasında fəaliyyət göstərən Yeni Xalq Fraksiyasının deputatı Georgi Arapov, heyvanlara zülm etməkdə şübhəli bilinən şəxslərin məcburi psixoloji müayinədən keçirilməsini tələb edən qanun layihəsini parlamentin gündəminə çıxarıb.
Sherg.az xəbər verir ki, sənəd Dövlət Dumasının rəsmi elektron bazasında dərc olunub.
Layihədə Rusiya Daxili İşlər Nazirliyinin məlumatlarına istinad edilir. Bu məlumatlara görə, 2024-cü ildə ölkə üzrə heyvanlara qarşı zülmlə bağlı 656 cinayət qeydə alınıb.
Hazırda bu cür hallara görə tətbiq olunan cəzalar adətən pul cəriməsi və ya icbari əmək ilə məhdudlaşır, psixoloji yardım və müalicə isə nadir hallarda tətbiq olunur.
"Kommerstant" nəşrinin məlumatına görə, Rusiya məhkəmələri yalnız aşkar psixi pozğunluq əlamətləri olduqda bu cür müayinəyə qərar verir.
Arapov isə bildirib ki, xüsusilə gənclərin iştirak etdiyi bu cür hallar, insanlara qarşı potensial zorakılığın xəbərçisi ola bilər və vaxtında diaqnostika çox vacibdir.
