“Sülh müqaviləsi imzalansa, qarşılıqlı olaraq sərhədlər tanınsa, şübhəsiz ki, bu, Qazaxın kəndlərinə də aid olacaq”
“Proseslər sərhədin mübahisəsiz, düz xətt üzrə çəkilməsinə doğru gedir”
Ermənistan Dilican (Tavuş) bölgəsinin Azərbaycanla sərhəddə yerləşən kəndlərindəki əhalinin evakuasiya edilməsi proqramını hazırlayıb.
Bölgənin qubernatoru Hayk Galumyanın avqustun 19-da qəbul etdiyi qərarda evakuasiya ediləcək əhalinin sayının, ərzaq tədarükünün və əsas ehtiyaclarının hesablanması, yaş qruplarına bölünməsi, bölgənin digər ərazilərində müvəqqəti və uzunmüddətli yaşayış yerlərinin, o cümlədən, insanların köçürüləcəyi yaşayış məntəqələrinin siyahısının hazırlanması əksini tapır. Ermənilər bunun Qazaxın işğal altındakı 7 kəndinin boşaldılması ilə bağlı olduğunu yazırlar. Bunun həmin istiqamətdə yeni hərbi toqquşmaya hazırlıq olması da istisna deyil.
Jurnalist, “Ayna.az” saytının redaktoru Tural Ağatlı bu barədə fikirlərini “Sherg.az”la bölüşdü. Onun sözlərinə görə, Qazaxın kəndləri tez-gec qaytarılacaq:
“Bu məsələ 10 noyabr üçtərəfli razılaşmasının ilkin versiyasında var idi. Sonradan isə çıxarıldı. İstənilən halda Qazaxın yeddi kəndinin qaytarılmasının ilkin versiyada olsa belə, gündəmə gətirilməsi Azərbaycanın bütün istiqamətlərdə ərazi bütövlüyünün təmin edilməsində israrlı olduğunu göstərir. Söhbət təkcə Qərb bölgəsində deyil, bütün dövlət sərhəddi boyu ərazi bütövlüyünün təmin edilməsindən gedir. Ona görə də məsələnin qısa vaxtda həllini tapacağına inanmıram. Amma sülh müqaviləsi imzalansa, qarşılıqlı olaraq sərhədlər tanınsa, şübhəsiz ki, bu, Qazaxın kəndlərinə də aid olacaq”.
T.Ağatlı məsələnin diplomatik yolla həllinə inanır:
“Bildiyiniz kimi, həmin yeddi kənddən üçü anklavdadır. Məncə, məsələ bir vaxtlar Ermənistan baş naziri Nikol Paşinyanın özünün də razı olduğu anklavların və eksklavların mübadiləsi ilə həllini tapacaq. Yəni dörd kənd qaytarılacaq, digər üçü isə Ermənistanın bizim nəzarətimizdə olan kəndləri ilə dəyişdiriləcək. Dilicanın boşaldılmasının ehtimal edilən müharibə ilə bağlı olduğu ağlabatan görünmür. Birincisi, savaş gözlənilmir. İkinci bir tərəfdən isə həmin tprpaqlar mübahisəli ərazilər deyil. Proseslər sərhədin mübahisəsiz, düz xətt üzrə çəkilməsinə doğru gedir”.
