Azərbaycan qonşu dövlətlərlə normal münasibətlərin formalaşmasının tərəfdarıdır
Azərbaycanın xarici işlər naziri Ceyhun Bayramov dekabrın 9-da İranın paytaxtı Tehrana səfər edəcək. Bunu İranın Xarici İşlər Nazirliyinin mətbuat katibi Səid Xətibzadə mətbuat konfransında deyib. Xətibzadənin sözlərinə görə, Azərbaycan xarici işlər naziri səfər çərçivəsində İran Prezidenti Həsən Ruhani, parlamentin sədri Məhəmməd Baqir Qalibaf və Ali Milli Təhlükəsizlik Şurasının katibi Əli Şəmxani ilə görüşəcək. Cənub qonşumuzun mövqeyi 44 günlük savaşın ilk günlərində bizi qane etməsə də, sonrakı günlərdə rəsmi Tehran ard-arda bəyanatlar verərək qonşuluq prinsiplərinə uyğun davranmağı bacardı. İranın ali rəhbəri başda olmaqla digər rəsmi şəxslər Azərbaycanın ərazi bütövlüyünü dəstəklədiklərini, Ordumuzun öz ərazimizdə anti-terror əməliyyatı apardığını etiraf etdilər.
Həm də cənub torpaqlarımızın işğaldan təmizlənməsi sayəsində Azərbaycanla İran arasındakı 132 km-lik sərhəd xətti yenidən dövlətimizin nəzarətinə keçdi. Bununla həm də İrana doğru işğal edilmiş ərazilərdən uzanan “qara əllər” və “qara yollar” kəsildi. Təsadüfi deyil ki, Prezident İlham Əliyev Azərbaycan və İran arasında dövlət sərhədinin tam nəzarətə götürülməsi münasibətilə Azərbaycanla yanaşı, İran xalqını da təbrik etmişdi. Siyasi şərhçirlər bundan sonra İranla münasibətlərdə yeni mərhələnin başlanacağını istisna etmirlər. İranın Azərbaycandakı fövqəladə və səlahiyyətli səfiri Seyid Abbas Musəvi də deyib ki, dost və qardaş Azərbaycanla daha sıx və isti münasibətlər qurmaq İranın xarici siyasətinin əsas prinsiplərindən biridir və prezident Ruhani bunu daim vurğulayıb. Səfirin sözlərinə görə, bir çox ortaq tarixi, mədəni, coğrafi, dil və s. cəhətləri nəzərə alsaq, İranla Azərbaycan arasında ikitərəfli münasibətlərin gələcək inkişafı daha isti və səmimi olacaq.
Millət vəkili, Demokratik İslahatlar Partiyasının sədri Asim Mollazadə “Şərq”ə açıqlamasında bildirib ki, Azərbaycan bütün ölkələrlə normal münasibət saxlamağın tərəfdarıdır. Yetər ki, həmin dövlətlər də ikitərəfli əlaqələrdə maraqlı və səmimi olsunlar. Deputatın sözlərinə görə, Azərbaycan xarici siyasətini ikili əməkdaşlıq və tərəfdaşlıq üzərində qurur:
“Azərbaycan qonşu dövlətlərlə normal münasibətlərin formalaşmasının tərəfdarıdır. Yaxın əlaqələrimizin olduğu qonşu ölkələrdən biri də İrandır. Azərbaycan qonşu İranla bir neçə sahədə sıx əməkdaşlıq edir.
Cənub qonşumuzla nəqliyyat və enerji sahəsində çoxsaylı birgə layihələr icra olunmaqdadır. Xüsusən, torpaqlarımız işğaldan azad olunnandan və İran-Azərbaycan sərhədləri tam bərpa ediləndən sonra ikitərəfli əməkdaşlığımız daha da genişlənəcək.
Rəsmi Tehran Azərbaycanın ərazi bütövlüyünü dəstəkləyir və əməkdaşlığı inkişaf etdirmək niyyətində olduğunu hər dəfə bəyan edir. Əlaqələrin yüksək olması hər iki tərəf üçün faydalıdır”.
