"Cənab Prezident İlham Əliyevin sədriliyi ilə keçirilən 6 ayın sosial-iqtisadi yekunlarına dair müşavirədə Ermənistanın icra etməli olduğu və öhdəsinə götürdüyü məsələlərə bir daha geniş toxunuldu".
Bunu "Sherg.az"a açıqlamasında millət vəkili Azər Badamov deyib.
Deputat bildirib ki, müşavirədə qarşı tərəfə də çox ciddi mesajlar ünvanlandı:
"Ermənistan 10 noyabrda imzalanmış üçtərəfli bəyanatın tələblərini müharibənin bitməsindən 1.8 ay keçməsinə baxmayaraq icra etmir. Bu bəyanata imza atmış Rusiya da Ermənistana kapitulyasiya sənədinə imza atarkən qəbul etdiyi öhdəliklərin icra edilməsinə görə heç bir təzyiq göstərmir. Ona görə də Ermənistan rəhbərliyi sözdə təqdim etdiyimiz bütün məsələləri qəbul etdiyini ifadə etsə də, əməldə heç bir dəyişikliyi etmir. 10 noyabrda imzalanmış üçtərəfli bəyanata əsasən erməni hərbi birləşmələri ölkəmizin ərazisindən çıxarılmalıdır. Həm də Zəngəzur dəhlizi açılmalı və sutkanın 24 saatı Naxçıvanla manesiz əlaqəmizi təmin etməlidir".
Parlament üzvü bəyan edib ki, Azərbaycan məsuliyyətli ölkə olaraq bütün məslələrə ciddi riayət edir:
"Üçtərəfli bəyanat imzalanan ilk gündən ermənilər Laçın dəlizi vasitəsilə sərbəst hərəkət edirlər. Cənab Prezident qarşı tərəflərə bildirdi ki, əgər Zəngəzur dəhlizi tezliklə açılmazsa, Laçın dəhlizini də bağlaya bilərik. Digər yandan vurğulandı ki, erməni hərbi birləşmələri ərazimizdən çıxarılmazsa, biz anti-terror əməliyyatları apara və ərazimizi erməni hərbiçilərdən təmizləyə bilərik. Ölkə başçımız bir daha vurğuladı ki, "biz müharibə istəmirik və bütün məsələləri sülh danışıqlar yolu ilə həll olunmasını istəyirik". Bununla yanaşı biz ordumuzu daha da modernləşdirərək gücləndiririk. Dövlət başçısı əgər məsələlər danışıqlar yolu ilə həll olunmazsa, yenidən müharibəyə hazır olduğumuzu bildirdi. Cənab Prezidentin çıxışları qarşı tərəflərdə diqqətlə izlənilir. Hesab edirəm ki, ölkə başçımızın ünvanladığı mesajlar qarşı tərəfi düşündürəcək və danışıqlar yolu ilə razılaşdırılmış məsələrin həll olunmasına hərəkətə keçəcəklər".
