Hesablama Palatası çoxuşaqlı anaların yaşa görə sosial müavinət hüququ müəyyən edilərkən onların 8 yaşınadək tərbiyə etdikləri ögey oğul və qızlarının nəzərə alınmasını da təklif edib. HP bununla bağlı təkliflərini Nazirlər Kabinetinə artıq təqdim edib. Burada söhbət «Sosial müavinətlər haqqında» qanuna dəyişikliklərdən gedir. Dəyişikliyin edilməsi üçün layihələr hazırlanıb. Hazırda layihə razılaşdırma mərhələsindədir.
Neftçilərin Hüquqlarının Müdafiəsi Komitəsinin rəhbəri Mirvari Qəhrəmanlı təklif edilən yeniliyin mütərəqqi olduğunu bildirdi:
- Ailədə ögey, doğma övlad olmur. Əgər bir ailədirsə, fərqi yoxdur, ananın övladıdır, yoxsa atanın, bütün övladlar doğma hesab edilməlidir. Biz sovet kinosunun bu mövzuda ən gözəl nümunələrini görmüşük. Özbək ailəsinin Böyük Vətən Müharibəsində bir ailədə böyütdüyü, doğma övladları qədər, hətta onlardan artıq sevdiyi, narahatlıq keçirdiyi «yad» uşaqlara necə qayğı göstərdiklərini filmdə izləmişik.
Sosial müavinət hüququ müəyyən edilərkən övladın ögey-doğmalığına fərq qoyulmaması, əlbəttə, məntiqidir. Çünki uşaqlar yalnız tam ailəyə – həm ana, həm də ata olan ailələrə övladlığa verilir.
Qadının özünün dünyaya gətirdiyi, yaxud həyat yoldaşının əvvəlki qadından dünyaya gəlmiş övladları da o ailənin üzvü hesab edilir və qadın bu uşaqların hamısına qayğı göstərir, qulluq edir. Əlbəttə, burada ayrı-seçkilik ola bilməz. M.Qəhrəmanlı qanunların mükəmməl hazırlanmalı olduğunu diqqətə çatdırdı:
- Qanunlar bir dəfə mükəmməl hazırlanmalıdır ki, tez-tez dəyişikliklər etmək məcburiyyəti yaranmasın. Uşağın doğması, ögeyi olmur. Uşaqlar bir ailədə böyüyüb, bir ana tərəfindən tərbiyə alırlarsa, bir ailənin üzvü hesab edilməlidirlər.
Mən təklif edərdim ki, övladlığa uşaq götürmüş ailələrə ayrılacaq müavinətlərin miqdarı yüksək olsun. Analıq kapitalı deyilən bir anlayış var. Ana – qadın istər öz övladı olsun, istərsə də övladlığa götürdüyü uşaq, onun böyüyüb ərsəyə çatması üçün böyük əmək, fədakarlıq sərf edir. Bu, nəzərə alınaraq müavinətlərin miqdarı da yüksək olmalıdır. Həm də nəzərə alaq ki, müavinətlər yüksək olarsa, uşaq evlərində bir nəfər də körpə qalmaz. Hamısı ailə, isti ocaq sahibi olar.
Məlahət
