"Ali təhsil ocaqlarının şəhərcik formasında paytaxtdan kənara köçürülməsi vacibdir”.
Bunu "Sherg.az”a Qəbələdə ali məktəblər üçün yeni və müasir binalar inşa olunmasından danışarkən "Bələdiyyələrin fəaliyyətinin təbliği” İctimai birliyinin sədri Vüqar Tofiqli deyib.
O bildirib ki, bu addım paytaxtda sıxlığın aradan qaldırılması, nəqliyyatın rahat hərəkəti üçün zəmin yaradacaq:
"Ali məktəblərin şəhər ətrafına köçürülməsi urbanizasiya prosesinə müsbət təsir edəcək. Qəbələ, Gəncə və s. şəhərlərdə ali təhsil müəssisələrinin yerləşdirilməsi məqsədəuyğundur. Xüsusilə ali məktəblər kampus şəklində tikilsə daha yaxşı olar. Bu zaman universitetin hər şəraiti, yataqxanası, idman zalı, oxu zalı bir yerdə cəmlənər və tələbələr üçün müsbət şərait yaranar.
Amma xeyli müddətdir ki, bu istiqamətdə söhbət aparılsa da real addımlar barədə məlumat yoxdur. Bu proses nə qədər sürətləndirilsə, o qədər yaxşıdır. Tezliklə məsələnin həll edilməsi tələbələrin hazırlığına da münbit şərait yaradar”.
Qeyd edək ki, Bakının mərkəzindəki ali təhsil müəssisələrinin paytaxtdan çıxarılması nəzərdə tutulub. Bu siyahıya Dövlət Tibb Universiteti, Pedaqoji Universitet, Texniki Universitet, Memarlıq və İnşaat Universiteti, İqtisad Universiteti və digərləri aiddir.
Dövlət Neft Akademiyasının da köçürülməsi planda olsa da, yeri məlum deyil. İddialara görə, universitetlərdən bəziləri şəhər kənarına, bəziləri isə Qəbələyə köçürüləcək, BDU isə Bakıda qalacaq.
Aysel Aslan
