"Arı sancmaları hər kəsdə eyni reaksiya yaratmır. Bu insanların orqanizmindən, allergik problemlərinin olub-olmamasından asılı olaraq dəyişir”.
Bunu "Sherg.az”a kütləvi arı sancmaları zamanı ilkin tibbi yardım üsulları barədə məlumat verərkən Təcili Tibbi Yardım Stansiyasının həkimi Şahvələd Məmmədov söyləyib.
O bildirib ki, xəstənin orqanizmindən asılı olaraq, arı dişləməsinin ağır fəsadları yaranır:
"Hətta tək bir arının dişləməsindən belə ölümcül vəziyyətə düşən xəstə ilə qarşılaşmışam. Cavan oğlan motosiklet sürərkən arı onun dilini dişləmişdi. Müayinə zamanı məlum oldu ki, həmin şəxsin arı dişləməsinə qarşı allergiyası olub, bu səbəbdən ölümcül vəziyyətə düşüb. Ona görə, hər kəs belə hallarda öz orqanizminin xüsusiyyətini bilməlidir. Bir dəfə arı dişləməsindən ciddi zərər görməyən adam, ikinci dəfə bu hadisə baş verərsə, şoka düşə bilər.
Kütləvi şəkildə arı sancmasının baş verməsi isə çox az hallarda rast gəlinir. Bu zaman da allergiyası olmayan insanlarda ölümcül fəsadlar yaranmır”.
Ş.Məmmədov söyləyib ki, kütləvi şəkildə arı dişləməsinə düçar olan şəxsi təcili xəstəxanaya çatdırmaq lazımdır:
"İlkin tibbi yardım məsələsinə gəlincə, arının iynəsini çıxartmaq lazımdır. Xəstəni uzanmış vəziyyətdə saxlayıb, ayaqlarını yuxarı qaldırmaq vacibdir. Bu xəstənin allergiyası olduğu halda şoka düşməsinin qarşısını alacaqdır. İstənilən halda, təcili tibbi yardım çağırmalı, yaxud xəstəxanaya çatdırılmalıdır.
İnsanlar bəzən "zəhərli arı” ifadəsini işlədirlər. Bu birmənalı yanlışdır, zəhərli arı olmur”.
Aysel Aslan
