Xaşmazda yararsız halda at əti aşkarlanıb.
Əhalinin ərzaq təhlükəsizliyinin təmin edilməsi, insan sağlamlığına ciddi zərər vuran, istifadəyə yararsız yeyinti məhsullarının satışının qarşısının alınması istiqamətində polis orqanlarının aidiyyəti qurumlarla birgə tədbirləri davam etdirilir.
DİN Mətbuat Xidmətinin məlumatına görə, aprelin 9-da DİN-in Baş İctimai Təhlükəsizlik İdarəsinə bilavasitə tabe olan Karantin tədbirlərini təmin edən Əlahiddə Polis Taboru əməkdaşları Qida Təhlükəsizliyi Agentliyinin nümayəndələri ilə birgə Xaçmaz şəhəri ərazisində reyd keçirib. Reyd zamanı Xaçmaz şəhər sakini B.Qanbayevin idarə etdiyi "Opel” markalı avtomobilə baxış zamanı yük yerindən natəmiz vəziyyətdə və sümükdən ayrılmış halda olan, çəkisi 330 kiloqram at əti aşkar edilərək götürülüb.
Ətdən götürülmüş nümunələr müvafiq ekspertizanın keçirilməsi üçün Qida Təhlükəsizliyi Agentliyinin laboratoriyasına təhvil verilib.
Faktla bağlı araşdırmalar aparılır.
Azad İstehlakçılar Birliyinin sədri Eyyub Hüseynov "Şərq”ə açıqlamasında bazarın tələb-təklif prinsipi ilə işlədiyini xatırlatdı:
- 22 ildir biz belə qanunsuzluqlarla mübarizə aparırıq. Amma nəticə yoxdur. Çünki satan məlumdur, alıcı isə yox. Bazar tələb-təklif prinsipi ilə işləyir. Kimsə at ətini alır ki, kimsə də atı öldürüb ətini satışa çıxarır. Əsas, sifarişçi tapılmalıdır.
Nə qədər ki, sifarişçi tapılıb məsuliyyətə cəlb edilməyib, bu cür hallar təkrarlanacaq. 2 il əvvəl də Xaçmazda külli miqdarda, yararsız halda at əti aşkarlanmışdı. Nəticəsi nə oldu? Proses yenə davam edir. Mən əvvəllər də təklif etmişəm ki, məsələyə DİN-in Mütəşəkkil Cinayətkarlığa Qarşı Mübarizə Baş İdarəsi qoşulmalıdır. Onlar cinayətkarların axtarışına qoşulsalar, qısa zamanda nəticə əldə edilər.
Nəticə ona görə yoxdur ki, at ətini hazırlayan tapılır, amma tələb edən, sifarişçi axtarılmır. Bilmirik at ətini hara təhvil verirlər, o ətdən nə hazırlayırlar? Kafelərdə, restoranlarda müştəriyə nə təklif olunur. Hansısa restoran sahibi əgər iddia edirsə ki, aldığıının nə əti olduğunu bilmir, yalan deyir.
Çünki bütün iaşə obyektləri ərzaq aldıqları, sifariş etdikləri məntəqələri tanıyırlar, kimə hardan ət gəlir, hər kəs bilir. At əti ilə digər mal-qara ətlərini səhv salmaq mümkün deyil. Yararsız ətlərin öz müştəriləri var. Ucuz qiymətə alır, istehsala buraxır və qazanc əldə edirlər. Məhz bu adamlar aşkarlanmalıdır və məsuliyyətə cəlb olunmalıdır ki, əhaliyə nə yedirirsiz?
Məlahət Rzayeva
