Son bir ay ərzində Dövlət Sərhəd Xidməti 20 əcnəbinin saxta sənədlərlə ölkəyə keçməsinin qarşısını alıb.
Qurumun mətbuat xidmətindən Lent.az -a daxil olan məlumata görə, son bir ay ərzində dövlət sərhədindən buraxılış məntəqələrində 20 əcnəbinin sənədlərinin saxtalaşdırılması müəyyən edilərək müvafiq tədbirlər görülüb.
Həmin əcnəbilərdən 4-ü İran, 4-ü Konqo, 3-ü Pakistan, 2-i Özbəkistan, 2-i Hindistan, 1-i Türkiyə, 1-i Tacikistan, 1-i Qvineya, 1-i Şri-Lanka və 1-i Moldova vətəndaşıdır.
Martın 12-də DSX-nin Sərhəd Qoşunlarının “Lənkəran” sərhəd dəstəsinin, Astara rayonunun Sım kəndi yaxınlığındakı sərhəd zastavasının xidməti sahəsində İrandan Azərbaycana doğru dövlət sərhədinin pozulmasına cəhdin qarşısı alınıb. Geriyə qaçan sərhəd pozucularının hərəkət marşrutu üzrə ərazidə axtarış aparılarkən 1 ədəd ağ rəngli bağlamada 2 kiloqram heroin və 500 qram metamfetamin aşkar olunaraq götürülüb.
Fakt üzrə əməliyyat-istintaq tədbirləri davam etdirilir.
