“Qaçqın düşən, ev-eşiyini itirən türklər üçün çadır və ərzaq yardımı etməliyik”
"Kərkükdəki türkmənlərə yardım etmək Azərbaycanın mənəvi borcudur”. Bunu "Şərq”ə açıqlamasında tanınmış türkoloq-alim, professor Firudin Cəlilov deyib. İraq türkmən liderlərinin Türkiyə və Azərbaycandan yardım istəməsinə münasibət bildirən professor bildirib ki, məsələyə aydınlıq gətirmək üçün tarixə nəzər yetirmək lazımdır:
"Orta əsrlərdən üzü bəri Kərkükdə yaşayanlar Azərbaycan türkləridir. Onların hamısı eynilə bizim ləhcədə danışırlar. Tək Kərkük yox, Mosul və Ərbil şəhərləri, Suriyadan Hələbə qədər olan ərazi qədimdən türk xalqlarının məskəni olub. Baxmayaraq ki, həmin ərazilər bir neçə yüz il Osmanlı dövlətinin tərkibində qalıb, amma oradakı türklər Azərbaycan ləhcəsini unutmayıblar. Kərkük və Mosul türkmənləri bizim ən yaxın qohumlarımız sayılır”.
F.Cəlilovun sözlərinə görə, vaxtı ilə Ermənistanda, indi isə İranda yaşayan azərbaycanlılar nə qədər bizdəndirlərsə, İraq və Suriyada yaşayan türklər də bizim qan qardaşlarımızdır: "Birinci Dünya müharibəsindən sonra İraq dövləti yaradıldı və həmin ərazilər yeni dövlətin tərkibinə keçdi. Ona qədər Kərkük və Mosul Türkiyənin tərkibində idi. Amma Lozan müqaviləsində qeyd olunmuşdu ki, əgər Kərkük türkmənlərinə hücum edilsə, onlar dar günə düşsələr, Türkiyə onları himayə etmək haqqına sahibdir. Həmin məqam millətlərarası komissiyanın protokolunda öz əksini tapıb. Bu baxımdan Türkiyə Kərkük və Mosul türkmənlərinə kömək etməkdə həm haqq sahibidir, həm də borcludur. Azərbaycanın isə Kərkükə yardım etməyə ən azı mənəvi haqqı var. Çünki oradakı türkmənlər bizim əcdadımızdır. Hesab edirəm ki, İraqdakı türkmənlərin Türkiyə və Azərbaycandan şikayət etməyə haqqı var. Heç olmasa, Kərkükə humanitar yardım göstərə bilərik. Qaçqın düşən, ev-eşiyini itirən türklər üçün çadır və ərzaq yardımı etməliyik. İraqdakı yezidi kürdlərin arxasında Avropa dayanır. Çünki onların əksəriyyəti xristiandır. PKK-lı kürdlərin arxasında da başqa güclər durur. Amma türkmənlərə yiyə duran yoxdur. Fikrimcə, Azərbaycan dövləti, xarici işlər nazirliyi bu sahədə ciddi addımlar atmalıdır”.
İsmayıl
