Bu gün saat 16:00 radələrində Heydər Əliyev prospektində ağır yol-nəqliyyat hadisəsi baş verib. Aeroport istiqamətində hərəkət edən "Hunday Tucson” markalı avtomobil Bakı Nəqliyyat Agentliyinin qarşısında "Renault” markalı avtomobillə toqquşaraq aşıb. Avtosfer.az-ın əməkdaşı hadisə yerindən xəbər verir ki, həmin yolda ciddi tıxac yaranıb. Hər iki avtomobil evakuator vasitəsilə ərazidən uzaqlaşdırılıb. Ehtimal olunur ki, hadisə ötmə-manevr qaydalarının pozulması nəticəsində baş verib. Qəza nəticəsində iki nəfər yaralıb, vəziyyətləri ağırdır.
Hadisə zamanı digər bir maraqlı hal baş verib. Belə ki, ənənəvi olaraq 100-ə yaxın maşın yolun kənarında saxlayaraq qəzanı seyr etməklə məşğul imiş. Avtomobillərin birindən 30-35 yaşlı bir nəfər pul çantasını oğurlamağa cəhd edib. Həmin avtomobilin sahibi də maşının qapısını açıq qoyaraq qəzanı seyr edirmiş. Lakin ərazidə olan Nizami rayon 23-cü polis bölməsinin əməliyyatçısı onu yerindəcə həbs edib. Avtosfer.az hadisə yerindən fotoları təqdim edir:
