Finlandiyada Avropa İttifaqının saatların çəkilməsindən imtina etmək qərarı ilə əlaqədar səsvermə keçirilib. Səsvermənin məqsədi hansı vaxta (qış, yoxsa yay vaxtına) keçidi saxlamağı müəyyən etməkdir.
Finlandiya Nəqliyyat və Kommunikasiya Nazirliyinin sifarişi ilə onlayn-platformada aparılan sorğunun nəticələri respondentlərin 52 faizinin qış vaxtını, 48 faizinin isə yay vaxtını üstün tutduqlarını göstərib. Hər iki nəfərdən biri Skandinaviya ilə Avropa arasında vaxt fərqinin 1 saatdan çox olmamasını arzulayıb.
Qeyd edək ki, hərdən ölkəmizdə də saatların çəkilməsi ilə bağlı rejimin dəyişməsi bəzi insanları narahat edir. Məsələni dəyərləndirən sosioloq-alim Əhməd Qəşəmoğlu "Şərq”ə bildirib ki, insanların əksəriyyəti rejimin dəyişməsinə etiraz edir: "Əslində bu cür sorğuları o qədər də mühüm hesab etmirəm. Ölkəmizdə də belə bir sorğu keçirilsə, eynilə Finlandiyadakı kimi, müəyyən qrup qış vaxt rejimini, yerdə qalanlar isə yay rejimini seçəcəklər. Elə insanlar var ki, öz rahatlıqları üçün qış rejimi istəyirlər. Amma bəziləri deyirlər ki, rejim dəyişəndə, bu, onların səhhətinə pis təsir edir. Deməli, həssas insanlar varsa, rejimin dəyişkənliyi onlara mənfi təsir edəcək. Təbii ki, həssas olmayanlar üçün heç bir fərq olmayacaq”.
Yeganə Bayramova
