"Nəhayət ki, Xəzərin hüquqi statusi ilə bağlı sazişin imzalanması baş tutdu. Çox mühüm sənəddir. Bu saziş Xəzər dənizini əməkdaşlıq və inkişaf bölgəsinə çevirəcək”.
Bunu "Sherg.az”a açıqlamasında millət vəkili, Demokratik İslahatlar Partiyasının sədri Asim Mollazadə deyib.
Deputat bəyan edib ki, 5-ci Sammitdə imzalanan ortaq sənəd Azərbaycanın mənafeyinə çox uyğundur:
"Saziş nəticəsində Azərbaycan mühüm iqtisadi və stateji layihələrin reallaşmasında böyük dəstək qazanacaq. Həm enerji sahəsinə, həm də nəqliyyat sektoruna mühüm töhfə verəcək. Anlaşma Xəzəryanı ölkələrin əməkdaşlığını da xeyli gücləndirəcək. Həmçinin, Orta Asiya ölkələrinin dünyaya çıxışı üçün əlverişli şərait yaradacaq. Burada ekoloji məsələlər də əhəmiyyətli rol oynayır. Xəzər suyunun qorunması və xüsusən nərə balığının çoxaldılması Xəzəryanı ölkələr üçün vacib amil sayılır. Dənizin ekoloji cəhətdən mühafizəsi üçün saziş faydalı olacaq. Düşünürəm ki, real layihələri həyata keçirmək üçün zəruri anlaşmadır”.Qeyd edək ki, Xəzər dənizinin hüquqi statusunun müəyyənləşdirilməsi ilə bağlı 1996-cı ildən aparılan danışıqlar öz məntiqi nəticəsini verib. Avqustun 12-də Qazaxıstanın Aktau şəhərində Xəzəryanı dövlətlərin prezidentlərinin iştirakı ilə tarixi əhəmiyyətli sənəd imzalanıb. V Xəzər sammitinin yekununda Xəzərin hüquqi statusunu müəyyən edən sənədi təsdiq ediblər.
İsmayıl
