"Müxtəlif ölkələrin xarici işlər nazirlərinin məhz Bakıda görüşməsi Azərbaycanın diplomatik üstünlüyünün nəticəsidir”.
Bu barədə "Sherg.az”a Azərbaycan, Türkiyə, Pakistan XİN rəhbərlərinin üçtərəfli görüşü ilə bağlı danışarkən politoloq Fikrət Sadıqov bildirib.
O qeyd edib ki, Azərbaycan ona dəstək verən, yardım göstərən dövlətlərlə müəyyən layihələr çərçivəsində ikitərəfli münasibətləri genişləndirir:
"Bunun bariz sübutları Bakı-Tbilisi-Qars layihəsi, ikitərəfli, üçtərəfli həyata keçirilən iri layihələrdir. XİN rəhbərlərinin görüşü də hər üç ölkənin maraqlarına cavab verməlidir. Demək olar ki, beynəlxalq tribunalarda hər üç ölkə eyni mövqedən çıxış edir. Həmçinin Türkiyə və Pakistan Azərbaycanın strateji partnyoru, müttəfiqidir.
Bu iki dövlət bizə yardım göstərir, onlarla müxtəlif hərbi-texniki sazişlərimiz var. Başqa sahələrdə də münasibətlərimiz yaxındır. Dövlətlər öz mövqelərini beynəlxalq strukturlarda açıq şəkildə bildirir, Azərbaycanın maraqlarını müdafiə edir. Bunu yüksək qiymətləndiririk. Növbəti görüşdə də belə məsələlər müzakirə ediləcək, bu dövlətlərlə əməkdaşlığımız yüksək səviyyədə davam edəcək”.
30 noyabr - 1 dekabr tarixlərində Bakıda keçiriləcək "Asiyanın ürəyi - İstanbul prosesi” yeddinci nazirlər toplantısına gəlincə isə politoloq bəyan edib ki, toplantıda daha yaxın, sıx əməkdaşlıq haqqında razılıq əldə ediləcək:
"Dünyada ciddi hadisələr baş verir. Qərblə Rusiya arasında qarşıdurma yaşanır. Postsovet məkanında xoşagələn hadisələr qeydə alınmır. Burada da bir sıra aparıcı ölkələrin marağı ön plandadır.
Belə böyük toplantılarının keçirilməsi Azərbaycanın maraqlarına cavab verir və dövlətimizin burada rolu önəmlidir. Dünyada gedən proseslərin fonunda həm Azərbaycan, həm də əməkdaşlıq etdiyimiz digər dövlətlər üçün birlikdə olmaq önəmlidir”.
Qeyd edək ki, Türkiyənin xarici işlər naziri Mövlud Çavuşoğlu keçiriləcək görüşlərlə əlaqədar noyabrın 30-da Azərbaycana səfər edəcək.
Aysel Aslan
