"Bu gün artıq "Turan ordusu” yaradılır. Azərbaycan və Türkiyə arasında hərbi sahədə müştərək istehsal mövcuddur”.
Bunu "Sherg.az”a Azərbaycan ordusunun 100 illik yubileyi münasibətilə keçirilən hərbi paradda Türkiyə-Azərbaycan birliyinin nümayiş olunmasından danışarkən millət vəkili Fərəc Quliyev söyləyib. Onun sözlərinə görə, artıq Azərbaycanda istehsal olunan hərbi məhsullar xaricə ixrac olunur:
"Sevindirici haldır ki, simvolik də olsa, Türk taboru da Azadlıq meydanından keçdi. Bu həm 1918-ci ildə türklərin Azərbaycana dəstək üçün gəlməsini simvolizə edirdi, həm də iki qardaş ölkənin birliyinin nümayişi idi. Bütün hallarda Türkiyə və Azərbaycanın problemləri ortaqdır və bunu aradan qaldırmaq üçün birlikdə hərbi gücümüzü ortaya qoymağa hazırıq.
"Türk şahinləri”nin Azərbaycan səmasında uçuşu sakinlər üçün də qürurverici oldu. Bir neçə il əvvəl İran hərbi təyyarələri Azərbaycan sərhədinə soxulduqda, "Türk şahinləri” Azərbaycan səmasında uçuşlar həyata keçirdi. Bu jestdən sonra qonşu dövlətlərin heç biri hərbi aparatlarla ərazilərimizə soxulmağa cəsarət etmədi. Bunun fonunda "bir millət, iki dövlət” deyimi dəfələrlə sübut olunub.Bu gün Azərbaycan ordusu dünyanın ən güclü 50 ordusu sırasındadır. Ölkə başçısı Prezident İlham Əliyevin də qeyd etdiyi kimi, ordumuzun gücü göz qabağındadır. Azərbaycan xalqı əmin ola bilər ki, silahlı qüvvələrimiz istənilən vəzifəni icra etməyə hazırdır. Keçirilən möhtəşəm parad düşmənə əsaslı mesaj oldu ki, dinc yolla məsələ həll olunmasa, Azərbaycan öz torpaqlarını hərb üsulu ilə işğaldan azad edəcək”.
Qeyd edək ki, Azərbaycan Respublikası Silahlı Qüvvələrinin yaradılmasının 100 illik yubileyi münasibətilə Bakının "Azadlıq" meydanında hərbi parad keçirilib.
Hərbi Parad başa çatdıqdan sonra Türkiyə Hərbi Hava Qüvvələrinin "Solo Türk” və "Türk Ulduzları” qrupları Bakı buxtası üzərində uçuşlar edib. Belə ki, "Solo Türk” qrupuna daxil olan 2 ədəd "F-16" tipli və "Türk Ulduzları” qrupuna daxil olan 7 ədəd F-5 tipli təyyarələr Bakı səmasında nümunəvi uçuşlar həyata keçiriblər.
Aysel Aslan
