""Bir kəmər, bir yol” layihəsi çərçivəsində əhatə olunan ölkələrin əhalisi dünya əhalisinin 63 faizini təşkil edir”.
Bunu "Sherg.az”a açıqlamasında sabiq maliyyə naziri, iqtisadçı Fikrət Yusifov deyib.
Ekspert bildirib ki, "Bir kəmər, bir yol” layihəsi çərçivəsində istehsal olunan Ümumi Daxili Məhsulun həcmi 21 trilyon ABŞ dollarından çoxdur:
"Yəni, bu, çox böyük əhatə dairəsi olan bir layihədir. Təbii ki, belə bir layihədə Azərbaycanın iştirakı ölkəmizin bu mühüm layihədən bəhrələnməsi üçün çox faydalıdır.
Pekindəki Forumda cənab Prezident iştirak etdi və Azərbaycana sərmayə qoymaq, ölkəmizdə iş qurmaq istəyən tərəflərlə ümumi dəyəri 800 milyon dollardan çox olan müqavilələr imzalandı. Çinin Azərbaycan üzərindən böyük həcmli yükləri daşınması üçün ölkəmizin potensialı və imkanları kifayət qədərdir.
Çinin xarici ticarət dövriyyəsi ötən il ümumilikdə 4, 6 trilyon dollar olub. Bunun tən yarısı ixracın payına düşür. Həmin ixracın bir hissəsi Azərbaycan üzərindən daşınacaq.
Bununla bağlı Azərbaycan Dəmir Yolları Qapalı Səhmdar Cəmiyyəti ilə Çinin aidiyyatı strukturları arasında müqavilələr bağlanıb. Hazırda yüklərin Azərbaycan üzərindən daşınması ilə bağlı ciddi işlər görülməkdədir. Azərbaycan iqtisadiyyatı yüksələn xəttlə inkişaf edir. Çinlə bu qədər yaxın əlaqələrin qurulması ölkəmizin iqtisadiyyatına çox ciddi töhfələr verəcək”.
İsmayıl
