"Televiziyalar cəmiyyətin bir güzgüsüdür. Cəmiyyət nəyi görürsə, ona uyğun tərbiyə olunur”.
Bu sözləri "Sherg.az”a açıqlamasında tanınmış media ekspert Zeynal Məmmədli deyib.
Ekspertin sözlərinə görə, hansısa telekanallarda xoşagəlməz hallar baş verirsə, deməli, nəzarət mexanizmi gücləndirilməlidir:
"Ölkəmizdə baş verən gerçək hadisələr televiziyada göstərilir. Ona görə də, məsələnin kökünə baxmaq lazımdır. Cəmiyyət olaraq ictimai qınaqdan qorxuruqmu? Belə qınaqlar olarsa, nə itiririk? Ümumiyyətlə, televiziyada neqativ hallar yaşanan zaman maddi itkilər olduğu kimi mənəvi itkilər də baş verir. Maddi itkiləri, yəni cərimələri ödəməklə can qurtulur. Lakin mənəvi itkiləri bərpa etmək mümkün deyil. Bu zaman yaralar gec sağalır. Söhbət yalnız televiziyalardan getmir. Eyni hadisələr parlamentdə, dövlət qurumlarında, məhkəmələrdə və.s yerlərdə yaşanır. Cəmiyyət üzvləri istər telekanallarda, istərsə də digər yerlərdə neqativ hallarla qarşılaşan zaman sarsıntılar keçirə bilir”.
Z. Məmmədli hazırda televizyalarımızda canlı yayımların elə də çox olmadığını bildirib:
"Canlı yayım olmadıqda mənfi halların qarşını asanlıqla ala bilirlər. Ona görə də, telekanallarımızda xoşagəlməz hadisələr baş verdikdə əsasən nəzarətçilər məsuliyyət daşımalıdır. Telekanalların birində pis ifadələr işlənirsə, yalnız həmin sözü deyən şəxs cəzalanmır. Ona görə də bəlkə "Space” kanalında nəzarətçilər baş verənləri bir anlıq gözdən qaçırıblar.
Buna baxmayaraq bir fərd olaraq hər kəs düşünməlidir ki, efir məkanında yaşananlar bütövlükdə cəmiyyətin tərbiyəsini formalaşdırır”.
Qeyd edək ki, bu günlərdə müğənni Rüfət Axundov "Space” kanalında yayımlanan "Hər səhər” verilişində ədəbsiz ifadələr işlədib. Milli Televiziya və Radio Şurası (MTRŞ) müğənniyə efir qadağasının tətbiq edilməsi ilə bağlı telekanallara şifahi xəbərdarlıq edəcək. MTRŞ baş verənlərə görə "Space” TV-ni də cərimələyib.
Yeganə Bayramova
