Son bir həftə ərzində erməni silahlı bölmələri cəbhənin müxtəlif istiqamətlərində iriçaplı pulemyotlarla mütəmadi olaraq atəşkəsi pozub. Hətta düşmənin təxribatçı hərəkətləri ATƏT-in Minsk Qrupu həmsədrlərinin bölgəyə səfəri əsnasında da səngiməyib.
Maraqlıdır, bir tərəfdə vasitəçilər danışıqların yeni mərhələsini başlamaq üçün dəridən-qabıqdan çıxır, prezidentlərin növbəti görüşünü təşkil etmək üçün bölgəyə səfərlər təyin edirlər. Digər tərəfdən isə danışıqların baş tutmamasına çalışan işğalçı dövlətin hərbi tör-töküntüləri cəbhə bölgəsində gərginlik yaradır. Əlbəttə, heç kimə sirr deyil ki, Ermənistan tərəfi müharibə başlayacağı təqdirdə Azərbaycanın qüdrətli ordusu qarşısında uzun müddət tab gətirə bilməyəcəyini yaxşı dərk edir. Xüsusən, aprel savaşından sonra düşmənin qorxusu və narahatlığı daha da çoxalıb. O halda döyüşdən qorxan ermənilərin cəbhə xəttində gərginlik yaratmasında məqsəd başqadır. Məsələ ilə bağlı "Şərq”ə danışan politoloq Natiq Miri deyib ki, vəziyyəti daim gərgin saxlamaq və erməni əsgərlərini işğal edilmiş ərazilərdə tutmaq üçün düşmən mütəmadi olaraq təmas xəttində gərginlik yaradır: "Erməni tərəfi Azərbaycana təzyiq göstərmək məqsədi ilə tez-tez atəşkəsi pozur. Əsas məqsəd isə Azərbaycan ordusunu müharibəyə çəkmək, hərbi təxribata cəlb etməkdir. İstəyirlər ki, milli ordumuz düşmənə adekvat cavab versin və ermənilər Azərbaycanı dünya ictimaiyyətinə sülhü sevməyən, müharibəyə meyl edən bir dövlət kimi tanıtsınlar. Əslində bu cür təxribatlar düşmən tərəfindən dəfələrlə həyata keçirilir. Biz onların təxribatına uymamalıyıq”.
İsmayıl
