"Yaşa görə pensiya təyin olunduqdan sonra işləməyə davam edən şəxslər bir sıra peşə sahələrini seçirlər. Bu təbəqənin əmək pensiyalarının artırılması təqdirəlayiq addımdır”.
Bunu "Sherg.az”a "Əmək pensiyaları haqqında” qanununun 37.3.1-ci maddəsinə 1 iyul 2017-ci il tarixdən edilmiş dəyişikliklərdən danışarkən iqtisadçı - ekspert Fuad İbrahimov söyləyib.
O bildirib ki, hazırkı dövrdə maaşından asılı olmayaraq, təqaüdlərə hər kəsin ehtiyacı var:
"Bu məsələyə diferensial qaydada baxmağı düşünmürəm. Ancaq digər təbəqələr üçün də pensiyaların artırılması müzakirə mövzusu olmalıdır. Elə insanlar var ki, illər boyu cüzi səviyyədə təqaüd alırlar. Bu dəyişikliklə həmin şəxslərin pensiyasında artım müşahidə olunmayacaq. Halbuki həmin şəxslərin təqaüdlərinin artırılması daha vacibdir.
Ümid edək ki, müəyyən qismə aid edilən artım tendensiyasının davamı gələcək və qeyd etdiyim kimi, daha çox ehtiyacı olan təbəqənin pensiyası da artırılacaq. Məlumatıma görə, bunun üzərində işlər aparılır və yaxın gələcəkdə digər təbəqənin təqaüdlərində də artım ediləcək”.
Qeyd edək ki, 1 iyul 2017-ci il tarixdən edilmiş dəyişikliklərə əsasən yaşa görə pensiya təyin olunduqdan sonra azı 6 il işləmiş və hazırda da işləyən 35 minə yaxın şəxsin pensiyası orta hesabla 137,5 manat artırılıb.
Aysel Aslan
