"Ermənistanda miqrasiya prosesi 25 ildən çoxdur artan templə davam edir. Bunun əsas səbəbi ağır iqtisadi-sosial problemlərdir”.
Bunu "Sherg.az”a "Altay” Sosial-iqtisadi Araşdırmalar Mərkəzinin rəhbəri Elçin Bayramlı Ermənistandakı acınacaqlı sosial durumla bağlı danışarkən bildirib.
İqtisadçı bəyan edib ki, son günlər erməni mediasında və sosial şəbəkələrdə bununla bağlı gündəmə gətirilən rəsmi rəqəmlər səhvdir, əslində miqrasiya daha böyükdür:
"Ermənistanın faktiki əhalisi heç 2 milyon da deyil. Ölkədə qalan vətəndaşlar heç bir perspektiv görmürlər və keçirilən sorğularda ilk imkanda ölkəni tərk edəcəklərini bildirirlər. Bütün bunlar İrəvanın apardığı işğalçı və terrorçu siyasətin nəticəsində yaranan ağır iqtisadi böhranın, regional iqtisadi layihələrdən kənarda qalmağın və təcrid olunmağın acı nəticəsidir. Nə qədər ki, Ermənistan Azərbaycanla düşmənçiliyi davam etdirəcək, işğal etdiyi əraziləri qaytarmayacaq vəziyyət daha da pis olacaq. Bunu "ermənizm” xəstəliyinə düçar olmamış sağlam ziyalılar açıq səsləndirirlər. Hətta, sadə xalq da bunu dərk edir. Paşinyan hakimiyyətinə gəldikdə, bu, sadəcə Qərb komandasının hakimiyyəti ələ keçirməsidir”.
İqtisadçı diqqətə çatdırıb ki, indiki komanda ölkəni böhrandan çıxara bilməyəcək:"Çünki nə iqtisadi potensial, nə regional inteqrasiya, nə də investisiya cəlbediciliyi var. Belə halda Ermənistan hökumətinin bircə çıxış yolu qalır, o da işğal etdiyi əraziləri geri qaytarmaq və Azərbaycanla normal münasibətlər qurmaqdır. Əks halda ölkəni bataqlıqdan çıxara bilməyəcəklər. İşğalçı ölkə böhran məngənəsində sıxılacaq. Azərbaycan Prezidentinin yeritdiyi düşünülmüş siyasət bu dilemmanı kəskinləşdirib. Artıq Ermənistandakı rejimin seçim vaxtı çatıb. Tezliklə, bu istiqamətdə ciddi dəyişikliyin olacağına inanıram”.
Qeyd edək ki, son günlər Ermənistanda sosial şəbəkələrdə və mediada son 3 prezidentin hakimiyyəti dövründə nə qədər insanın ölkəni tərk etməsi ilə bağlı qızğın müzakirələr gedir. Erməni mətbuatı yazır ki, Levon Ter-Petrosyan, Robert Köçəryan və Serj Sərkisyanın hakimiyyəti dövründə Ermənistandan 1 milyon 22 mindən artıq insan xaricə axın edib. Erməni cəmiyyəti hər üç prezidentin hakimiyyəti dövrünü kəskin tənqid edərək, ölkəni fəlakətə sürükləməkdə və məhv etməkdə ittiham ediblər.
İsmayıl
