Qəbələ rayonunda dini radikalizmin təbliğində şübhəli bilinən bir qrup şəxslərin evində axtarış aparılıb. Qəbələ Rayon Polis Şöbəsi və Dövlət Təhlükəsizliyi Xidməti (DTX) əməkdaşlarının birgə həyata keçirdikləri əməliyyat zamanı qadağan olunmuş dini ədəbiyyat və elektron daşıyıcılar aşkar edilib.
Bəhruz Qasımov və Elnur Tahirovun evlərindən ümumilikdə 77 ədəd dini təyinatlı ədəbiyyat, 11 ədəd video və audiokaset, 14 ədəd CD disk və 1 ədəd kustar üsulla hazırlanmış xəncər tapılıb.
Maraqlıdır, ölkəyə dini ədəbiyyatlar necə gətirilir və bu prosesi kimlər həyata keçirir? Təbii ki, bir qrup şəxslər regionlarda dini radikalizmin təbliğini gücləndirmək və kütlə arasında dini təbliğat, zərərli sektaları təbliğ etmək məqsədilə bu cür yollara əl atır. Lakin bu işin kimlər tərəfindən icra olunması sual altındadır.
Mövcud vəziyyətlə bağlı "Şərq”ə danışan İctimai Tədqiqatlar Mərkəzinin sədri, kriminalist İlqar Altay isə düşünür ki, regionlarda dini ədəbiyyatların yayılması işinin arxasında xüsusi xarici mərkəzlər, hətta dövlətlər dayanır.
Onun sözlərinə görə, prosesi həyata keçirmək üçün xarici mənbələrdən külli miqdarda vəsaitlər də ayrılır:
"Qadağan olunmuş dini kitablar normal, təmiz din yox, dini ekstremizm və fanatizmi təbliğ edib yaydığına görə qadağan olunub. Azərbaycanda isə xaricdən yönləndirilən dini radikalizm və ekstremizm, fanatizm var. Həmçinin dini radikalizmin bazaları da mövcuddur.
Bu fəaliyyət təbliğatsız baş tuta bilməz və təbliğatın əsas vasitələrindən biri kitab, ədəbiyyatdır. Həmin kitabların mövcudluğu iki yolla - ya ölkəyə gətirilmə, ya da ölkə daxilində çap edilmə ilə ola bilər. Böyük ehtimalla gətirilmə variantı daha çoxdur. Çünki açıq deyək ki, dini ekstremizmə qarşı ölkədə nəzarət güclüdür.
Bu da müxtəlif yollarla, xüsusi ilə gömrük-sərhəd postlarından daha çox, sərhədlərin qeyri-buraxılış, yəni ucqar yerlərdən qaçaq formada ölkəyə daxil ola bilir. Ancaq indiki dövrdə çap dəzgahı kimi alət ve materialların əldə olunma problemsizliyinə görə qadağan olunmuş dini ədəbiyyatın ölkə daxilində çap edilmə variantını da istisna etmək olmaz”.
Qadağan olunmuş dini ədəbiyyatın nə üçün daha çox regionlarda yayılması sualına gəlincə, İ.Altay səbəblərin müxtəlif olduğunu deyib. Onun sözlərinə görə, regionlarda müəyyən boşluqlar var:
"Bakıya nisbətən orda hüquq-mühafizə nəzarəti zəifdir. İnsanların məşğulluğu da xeyli aşağıdır, savadsızlıq, intellektin aşağı olması da rol oynayır. Gerilik, xurafat düşüncəsinin qarşısında duracaq paytaxt müasirliyi təbii ki, regionlarda yoxdur”.
Yeganə Bayramova
