"Dağlıq Qarabağ münaqişəsinin sülh yolu ilə həll olunmasında əsas məsələ erməni xalqının qərarıdır”.
Bunu "Sherg.az”a fransalı professor Jak Soppelsanın Dağlıq Qarabağ münaqişəsinin həll prosesinə digər dövlətlərin cəlb edilməsi barədə təklifinə münasibət bildirərkən millət vəkili Rüfət Quliyev söyləyib.
O diqqətə çatdırıb ki, ATƏT-in Minsk qrupuna daxil olan ölkələrin dəyişib-dəyişməməsindən asılı olmayaraq, sülh prosesində ciddi dəyişiklik olmayacaq:
"Hazırda Minsk qrupunda təmsil olunan dövlətlər də güclüdür. Belə bir ifadə var: toplananları dəyişdikdə, cəm dəyişmir. Ona görə, hesab edirəm ki, həll prosesində iştirak edən dövlətlərin dəyişməsi ciddi müsbət nəticələr vəd etmir.
Minsk qrupunun fəaliyyəti bizi qane etmir. Bunu dəfələrlə qeyd etmişik. Amma bilirik ki, bu prosesin arxasında hansı qüvvələr dayanır. Həmin qüvvələrin belə mövqeyinə baxmayaraq, erməni xalqının obyektiv mövqeyə gəlməsi əsasdır. Həll prosesinə təsir edən amillərdən biri də Ermənistandan kənarda məskunlaşan lobbinin mövqeyidir. Ona görə, prosesə əlavə qüvvələrin, fərqli dövlətlərin daxil olması vəziyyəti dəyişdirməyəcək.
Erməni xalqı ayağa qalxıb, Qarabağın qayıtması qərarını versə, Ermənistan üçün də müsbət gələcək şansı yaranacaq. Bununla yanaşı Dağlıq Qarabağda yaşayan ermənilər də normal şəkildə yaşaya biləcəklər. Prezident İlham Əliyev dəfələrlə qeyd edib ki, torpaqlarımız işğaldan azad olunsa, Azərbaycan hökuməti Qarabağa analoqu olmayan muxtariyyət verməyə hazırdır”.
Qeyd edək ki, J. Soppelsanın sözlərinə görə, artıq uzun illərdir, ATƏT-in Minsk qrupunun Dağlıq Qarabağ münaqişəsinin nizamlanması istiqamətində fəaliyyəti heç bir nəticə vermir:
"Mən Dağlıq Qarabağ münaqişəsinin həllində bu qurumun nümayiş etdirdiyi zəiflikdən təəssüflənirəm. BMT Təhlükəsizlik Şurasının 5 daimi üzvü (Çin, Fransa, Rusiya, Böyük Britaniya, ABŞ) var və onlardan üçü ATƏT-in Minsk qrupunun həmsədridir. Hesab edirəm ki, həmsədrlərin sayını artırmaq, Minsk qrupuna yeni dövlətlər cəlb etmək lazımdır”.
Aysel Aslan
