"2017-ci ildə ölkəmizə gələn turistlərin əksəriyyəti Ərəb ölkələrinin vətəndaşları olub”.
Bunu "Sherg.az”a Azərbaycana turist axınının nəticələrindən danışarkən iqtisadçı, millət vəkili Vahid Əhmədov deyib.
O bildirib ki, ölkədə keçirilən beynəlxalq tədbirlərə dəvət edilənlər və istirahət məqsədilə gələnlər turistlərin sayında ciddi artım yaratdı:
"Bunu danmaq olmaz. Xidmət sahəsində mövcud olan problemlər də yavaş-yavaş aradan qaldırılır. Qiymət siyasətində də dönüş əldə edilir. Reklam və PR sahəsində də Turizm nazirliyi, digər qurumlar tərəfindən ciddi işlər görülür.
Ölkəmizin xaricdə təmsil olunması da kifayət qədər yüksək səviyyədədir. Həmçinin indiki şəraitdə, turizm cəhətdən əlverişli, stabil ölkələr bir qədər azdır. Bəzi dövlətlərdə çox ciddi münaqişələr, terror təhlükəsi hökm sürür. Lakin Azərbaycan stabil dövlətdir. Dağlıq Qarabağ problemi olsa da, daxildə sabitlik, təhlükəsizlik hökm sürür. Bu isə turistlər üçün ən vacib xüsusiyyətdir. Bütün bunlar turizmin inkişafına təkan verir”.
Turist axınının iqtisadiyyatımıza təsirlərinə gəlincə, deputat vurğulayıb ki, iqtisadiyyatın inkişafı sürətlənəcək:
"Bir müddət sonra biz bunları müşahidə edəcəyik. Gələn ilin büdcəsində müəyyən artımlar olacaq. Baxmayaraq ki, neftin qiyməti 45-50 dollar səviyyəsindədir, qeyri-neft sahəsinin inkişafına təkan yaranacaq. Bu sahənin bir qolu da turizmdir. Burdan gələn gəlirlər maliyyə artımını təmin edəcək”.
Qeyd edək ki, mədəniyyət və turizm naziri Əbülfəs Qarayev bu ilin 8 ayında Azərbaycana 2 milyon 248 min turist gəldiyini açıqlayıb.
Aysel Aslan
