“Əgər doğrudan da ortada diskriminasiya faktoru varsa, buna öz etirazımızı bildirməliyik”
Gürcüstanın azərbaycanlı vətəndaşı Orxan Abbasa qarşı terrorizmə çağırış maddəsi üzrə cinayət işi açılıb. Buna səbəb isə O.Abbasın 2016-cı ilin aprel döyüşləri zamanı "Facebook” sosial şəbəkəsində Ermənistan əleyhinə yazdığı statusdur. O, statusunda Gürcüstan azərbaycanlılarına müraciət edərək Azərbaycanın Gürcüstandakı səfirliyi qarşısında dəstək aksiyası keçirmək əvəzinə, Ermənistan səfirliyi önündə etiraz aksiyası keçirərək Ermənistan bayrağını yandırmaq lazım olduğunu yazıb.
O.Abbas 2016-cı il aprelin 21-də Gürcüstan Dövlət Təhlükəsizliyi Xidmətinə çağırıldığını deyib: "Xidmətdə 10 saat dindirilmədən sonra mənə qarşı cinayət işinin açıldığı bildirildi. Bu ilin aprel ayında yenidən məni DTX-ya çağırdılar və may ayında iş üzrə ilk məhkəmə iclası keçirildi. Mənim Azərbaycana qaçmaq ehtimalım əsas gətirilərək barəmdə həbs-qəti imkan tədbirinin seçilməsi məsələsi qaldırıldı. Vəkillərimin etirazından sonra 6 min lari girov məbləğində azadlığa buraxıldım. Ailəmin bu məbləğdə girovu ödəmək imkanı olmadığına görə, girov kimi qardaşımın torpaq sahəsini qoyduq”.
İş üzrə son məhkəmə iclasının iyunun 20-də keçirildiyini qeyd edən O.Abbas prokurorun ona qarşı 2 ildən 6 ilədək azadlıqdan məhrumetmə cəzası istədiyini deyib: "Məhkəmə prosesi davam edir və növbəti məhkəmə iclası iyulun 3-nə təyin olunub. Mənə qarşı açılmış cinayət işi olduqca ədalətsiz və son dərəcə absurddur. Mən terrorizm və radikallıqdan uzaq insanam”. O.Abbas hesab edir ki, müsəlman və etnik azərbaycanlı olduğuna görə diskriminasiyaya məruz qalır.
Millət vəkili Fazil Mustafa isə Gürcüstan hökumətinin qanunlarında başqa ölkənin bayrağını yandırmağa çağırışın cinayət əməli kimi tövsif olunub-olunmadığını dəqiq bilmir:
"Bunu bilmədiyimiz üçün konkret bir fikir bildirmək, etiraz etmək doğru deyil. Qanunvericilikdə öz əksini tapan bir haldırsa, Azərbaycanın müdaxiləsi də mümkün deyil. Əgər Gürcüstan qanunvericiliyində belə bir maddə varsa, soydaşımız bunu bilməli və sözügedən paylaşımı etməməli idi. Əgər bilmədən edibsə, deməli, niyyəti cinayət törətmək olmayıb, sadəcə olaraq öz hisslərini ictimailəşdirib. Bir bu fakta görə, Gürcüstanda azərbaycanlılara qarşı diskriminasiya inandırıcı görünmür. Çünki qanunsuz şəkildə Gürcüstan hökumətinin azərbaycanlını həbs etməsi müəyyən problemlər yarada bilər”.
Gürcüstanda azərbaycanlıların diskriminasiyaya uğradığını istisna etməyən millət vəkili deyib ki, Gürcüstanın Xarici İşlər Nazirliyi bir neçə azərbaycanlı ziyalının sərhədi keçməsini arzuolunmaz hesab edib.
"Burada əsas məqsəd isə orada Azərbaycan mədəniyyətinin yayılmasına ciddi şəkildə maneçilik törətməkdən ibarətdir. Bu addım diskriminasiya kateqoriyasına daxildir. Azərbaycan tərəfi bunun üzərində dava aparmalıdır ki, hansı əsasla Azərbaycandan olan müxtəlif ziyalıların ölkəyə daxil olmasını qadağan edirsən? Bu, xoşagəlməz haldır. Gürcüstan vətəndaşı olan azərbaycanlıların dədə-baba torpaqlarına gedə bilməməsi heç bir ölkə qanunvericiliyinə cavab vermir. Sözügedən məsələ isə fərdi olduğu üçün araşdırma aparılmalıdır. Əgər doğrudan da ortada diskriminasiya faktoru varsa, buna öz etirazımızı bildirməliyik. Gürcüstan qanunlarına uyğundursa, bizim söz haqqımız yoxdur.
Şəymən
