Manatın real qiymətinə çatması 3-4 il çəkəcək.
Bunu Sherg.az-a iqtisadçı-ekspert Oqtay Haqverdiyev deyib.
Onun sözlərinə görə, hazırda üçüncü devalvasiya passiv şəkildə davam edir:
"Sadəcə olaraq, birinci və ikinci devalvasiya zərbə ilə özünü göstərdi. Hazırda isə manatın yavaş-yavaş dəyərdən düşməsinin şahidi oluruq. Manatın buraxılması rəsmi formada elan edildi. Lakin əvvəlkilər kimi böyük təsiri olan devalvasiya olmayacağı da qəti deyil. Manatın məzənnəsinin qeyri-sabitliyi, dolların qismən bahalaşması davam edəcək. İlin ortalarında bütün iqtisadçılar kimi mən də dolların 2 manat olacağı barədə açıqlama vermişdim. Lakin bu gün manatın məzənnəsi Mərkəzi Bank tərəfindən tənzimlənir. Milli valyuta birdən buraxılmadığından onun real qiymətinə gəlib çatması da uzun vaxt ala bilər. Bu müddətin 3-4 il çəkməsi proqnozlaşdırılır ki, məhz bu illər ərzində manatın həmin rəqəmə çatması mütləq baş verəcək”.
O. Haqverdiyev neftin dünya bazarında qiymətinin manatın məzənnəsinə təsirini də açıqlayıb:
"Bəzən fikir yürüdülür ki, manatın məzənnəsinin azalması neftin qiymətindən asılıdır. Qeyd etməliyəm ki, bütün valyutaların tutumluluğu olduğu kimi Azərbaycan manatının da tutumluluğu neftin və qazın satışı ilə tənzimlənir. Məlum olduğu kimi, dünya bazarına çıxarmağa başqa istehsal olunan məhsulumuz yoxdur. Başqa ölkələrin məzənnələrində isə digər sahələrlə qarşılıqlı şəkildə bu həyata keçirilir. Məsələn, dolların bu qədər baha olmasının səbəbi odur ki, məzənnəsinə hər hansı bir sahə təsir edərsə, digər sahələr onu tənzimləyir. Amerikada gücləndirilmiş iqtisadiyyat bu şəkildə öz inkişafını təmin edir. Azərbaycan iqtisadiyyatı isə hələlik bu səviyyədə deyil”.
Ayyət Əhməd
