Bu gün Milli Televiziya və Radio Şurasında (MTRŞ) televiziya və radio kanallarının rəhbər şəxsləri ilə görüş keçirilib.
"Sherg.az"ın məlumatına görə, MTRŞ sədri Nuşirəvan Məhərrəmli jurnalistlərə bildirib ki, görüşün keçirilməsində məqsəd Azərbaycanda teleradio yayımı məkanında teleseriallarla bağlı mövcud vəziyyəti müzakirə edib, problemlərin həlli yollarını tapmaq idi.
N.Məhərrəmli Azərbaycan televiziya məkanında serialların mövcud vəziyyətinin çox narahatverici olduğunu bildirib.
O qeyd edib ki, serialların ssenarisi, qeyri-peşəkar aktyorların iştirakı, texniki çatışmazlıqlar, Azərbaycanın ailə dəyərlərinə uyğun olmayan mövzular, teleseriallarda bayağı, qeyri-etik ifadələrin işlədilməsi narahatedici məqamlardır:
"Ona görə də bu sahədə çalışanlarla məsələləri müzakirə edib problemləri aradan qaldırmaq istəyirik. Ölkədə nümayiş olunan seriallar həddən artıq çoxdur. Narazılıq adətən komediya və kriminal janrda çəkilən seriallarla bağlıdır. Bu seriallarda Azərbaycan ailəsinə xas olmayan hərəkətlər göstərilir. Qayınata - kürəkən, qayınana - kürəkən, ata - oğul, ata - qız, bacı - qardaş münasibətləri, hörmətsiz ağsaqqal, qeyrətsiz oğul məsələsi efirdə geniş istifadə olunur. Bu da bizi narahat edən məqamlardandır”.
