Bu gün Qaradağ Rayon Məhkəməsində Müsavat Partiyası Gənclər Təşkilatının həbsdə olan sədri Əbülfəz Sadıqlı, əmisi oğlu Asif Sadıqlı və "Nikoyl Bank"ın əməkdaşı olmuş Kamran Abbasovun işi üzrə proses davam etdirilib.
Trend-in məlumatına görə, hakim Fuad Huseynovun sədrliyi ilə keçirilən prosesdə dövlət ittihamçısı çıxış edib.
Prokuror təqsirləndirilən şəxslərin hər biri barəsində 2 il 6 ay müddətinə azadlığın məhdudlaşdırılması hökmünün çıxarılmasını istəyib.
Hakim müşavirəyə gedib.
Müşavirədən sonra məhkəmə hökmü elan olunub.
Hökmə görə, təqsirləndirilən şəxslərə şərti cəza verilərək azadlığa buraxılıblar.
Qeyd edək ki, Ə.Sadıqlı 2018-ci ilin noyabrında həbs edilib. Ona qarşı dələduzluq və saxta sənəd hazırlayaraq ondan istifadə etmək ittihamı verilib.
İttihama əsasən, Ə.Sadıqlı yol polisinə "Nikoyl Bank"ının krediti ilə aldığı "Niva” markalı avtomobilə görə borclu qaldığı 5 100 manatın ödənməsi barədə saxta arayış təqdim edərək maşını öz mülkiyyətinə keçirib, daha sonra satıb.
