Ermənistan Silahlı Qüvvələri işğal etdikləri Azərbaycan torpaqlarında hərbi təlimə başlayıb. Düşmən ordunun təlimləri qoşunların qarşıdurma xəttinin Ağdam istiqamətində keçirilir. Təlim zamanı zirehli texnika və artilleriya qurğularından istifadə edilir. Atəş səsləri cəbhəyanı ərazilərdə aydın eşidilir.
Politoloq Natiq Mirinin sözlərinə görə, ermənilərin hərbi təlim keçirməsinə səbəb Azərbaycan ordusunun keçirdiyi genişmiqyaslı təlimlərin erməni cəmiyyətində yaratdığı xofdur:
"Ordumuzun təlimlərinə 25 000 nəfərədək şəxsi heyət, 250-dək tank və digər zirehli texnika, 1000-dək müxtəlif çaplı raket və artilleriya qurğusu, reaktiv yaylım atəş sistemi və minaatan, 50-dək müxtəlif təyinatlı ordu və cəbhə aviasiyası cəlb olunub.
Ermənistan isə bu səviyyədə hərbi təlim keçirmək qüdrətində deyil. Onların atdığı bu addım ictimai rəyə hesablanıb.
Daxildəki gərginliyi və Qarabağdakı erməniləri sakitləşdirmək üçün adekvat təlimlər keçirmək istəyirlər. Ancaq onların keçirdiyi kiçikhəcmli təlimlər heç bir halda qüdrətli Azərbaycan ordusunun keçirdiyi təlimlərlə müqayisəyə gələ bilməz. Hətta Dağlıq Qarabağda hərbi əməliyyatlar başlasa da, erməni ordusu Azərbaycan Silahlı Qüvvələrinin qarşısında bir həftədən artıq duruş gətirə bilməz. Bu cür acizanə təlimlərlə Azərbaycana qarşı "əzələ” nümayiş etdirirlər. Halbuki Ermənistan siyasi dairələrində, ictimai rəydə və Ermənistana havadarlıq edən ölkələrdə belə bu təlimlər ciddi qəbul olunmur”.
N.Mirinin sözlərinə görə, Ermənistan Silahlı Qüvvələri işğal etdikləri Azərbaycan torpaqlarında hərbi təlim keçirməsi ilə bağlı rəsmi notalar verilsə belə bunun bir faydası olmayacaq. Etiraz müraciətləri etməkdənsə, Azərbaycan ordusu lokal müharibələrə başlayıb bir neçə yaşayış məntəqəsini azad etsə, daha yaxşı olar.
Şəymən
