ABŞ və Ermənistanın xarici siyasət idarələri prezident Donald Trampla baş nazir Nikol Paşinyanın görüşmək imkanını müzakirə edirlər. Bunu Ermənistanın Amerika Birləşmiş Ştatlarındakı səfiri Qriqor Hovannisyan deyib.
Səfir bildirib ki, gündəlikdə dayanan görüşün reallaşması üçün rəsmi İrəvan ciddi səy göstərir. Bundan əvvəl Paşinyan da bəyan etmişdi ki, sentyabrda Nyu-Yorkda ABŞ-a səfər etməyi planlaşdırır. Amerikalı siyasi ekspert Piter Teys də vurğulayıb ki, hazırda erməni lobbisi ABŞ Konqresinə və Ağ Evə güclü təsir göstərir.
Teys bildirib ki, prezident Tramp Azərbaycanla ticarət, mədəniyyət və müdafiə sahəsində əməkdaşlığı genişləndirməyi düşündüyü üçün erməni lobbisi narahat olub: "Hazırda Ağ Ev müxtəlif lobbi qruplarının təsirini azaltmağa yönəlmiş qanun layihələri qəbul edir. Tramp erməni lobbisi də daxil olmaqla, bir sıra lobbi qruplarının ABŞ Konqresi və icra orqanlarına təsirini azaltmaq üçün ciddi işlər görür”.
Amerikadakı erməni fəallığı ilə bağlı "Şərq”ə açıqlama verən politoloq Qabil Hüseynli bildirib ki, uzun illərdir ABŞ-da ciddi fəaliyyət göstərən erməni lobbisi bir çox sahələrə təsir etmək imkanı qazanıb. Onun sözlərinə görə, indiki məqamda Nikol Paşinyanın Donald Trampla görüşü bir qədər mürəkkəb məsələdir:
"Tramp postsovet dövlətləri içərisindən indiyədək yalnız Qazaxıstan və Özbəkistan prezidentləri ilə görüşüb.
Ermənistan kimi kiçik, Rusiyanın vassalı olan bir ölkə rəhbərinin ABŞ prezidenti ilə təması üçün erməni lobbisinin güclü dəstəyi şərtdir. O baxımdan Amerikada olan erməni lobbisi görüşün baş tutması üçün canfəşanlıq edir. Bütün maneələrə rəğmən, görüşün reallaşması ehtimalı da var. Çünki Amerika Rusiyaya yaxın bir ölkənin Moskvanın kurasiyasından çıxmasında maraqlıdır. Trampın tərəfdaşları Rusiya ilə bağlı məsələlərdə ona tövsiyə verərkən, postsovet məkanındakı Moskvaya yaxın ölkələrin ələ alınması təklifini irəli sürürlər.
Görünür, Tramp bu təkliflərə müsbət yanaşır. Ona görə də son dönəmlər keçmiş sovet ölkələrinə yaşıl işıq yandırır. Məlumatlara görə, Ağ Ev rəhbəri Ermənistan kimi ölkələrdə Rusiya əleyhinə olan bütün proseslərə diqqətlə yanaşır. Lakin Tramp-Paşinyan görüşü baş tutsa belə İrəvanın istəyinə nail olacağını zənn etmirəm. Çünki son dövrlər Azərbaycan-ABŞ əlaqələri kifayət qədər inkişaf edib. Ağ Ev hökuməti rəsmi Bakıya etibarlı tərəfdaş kimi baxır. Münaqişənin həllində vasitəçi olan bir ölkənin işğalçı tərəflə yaxınlaşması inandırıcı deyil”.
İsmayıl
