"Ordumuzun 100 illiyi ilə bağlı hərbi paradın keçirilməsi müasir Azərbaycan ordusunda olan irəliləyişi bir daha göz önünə sərdi”.
Bunu "Sherg.az”a iyunun 26-da keçirilən hərbi parad haqqında fikirlərini bölüşərkən Qarabağ qazisi, xüsusi təyinatlı hərbçi, ehtiyatda olan gizir Natiq Mehdiyev söyləyib.
O bildirib ki, silahlı qüvvələrin müasir hərbi texnikası, silahları və peşəkar kadr hazırlığı paradda bütün möhtəşəmliyi ilə nümayiş olundu:
"Prezident İlham Əliyevin ordumuzun təminatına xüsusi diqqət yetirməsi, müdafiə naziri Zakir Həsənovun hərbi uğurları, orduda nizam-intizam yaratması, inkişafa nail olması vətənə qulluq edən hərbçiləri ruhlandırır. Azərbaycan artıq silah idxal edərək, ordunu silahlandırmaqla qalmır, eyni zamanda özümüz silah istehsal edirik.
İnkişaf etmiş sənaye nəticəsində müasir silahlar artıq ölkəmizdə də istehsal olunur, hətta xaricə satılır. Təşkil edilən hərbi paradda düşmənə layiqli mesajlar ötürüldü. Boşuna deyil ki, dünya mətbuatında da işıqlandırılan hərbi paradımız düşməni ciddi şəkildə narahat edib.
Hesab edirəm ki, Azərbaycanın ən yaxşı silahı əzmkar, döyüş ruhlu hərbçisidir. Çünki silah nə qədər dağıdıcı, nə qədər güclü olur olsun, onu idarə edən vətən oğlu güclü iradə nümayiş etdirmədikdə, qələbə bayrağını qaldıra bilmərik. Əminliklə deyirəm ki, Azərbaycan əsgərləri bu vətənpərvərliyi, milli ruhu ən yüksək səviyyədə nümayiş etdirirlər. Qorxmaz hərbçilərimizin, hansı silahı istifadə edirlər, etsinlər, həmişə qalib gələcəklərinə əminəm”.
Qeyd edək ki, iyunun 26-da Azərbaycan ordusunun 100 illik yubileyi münasibətilə, Bakının Azadlıq Meydanında möhtəşəm hərbi parad keçirilib. Paradda çıxış edən Ali baş Komandan İlham Əliyev ordumuzun qüdrəti və bu istiqamətdə qarşıda duran bir sıra məsələlərə toxunub. Prezident vurğulayıb ki, gün gələcək, işğaldan azad olunmuş torpaqlarda qaldırılan Azərbaycan bayrağı "Azadlıq" meydanına gətiriləcək və hərbi paradda nümayiş etdiriləcək.
Aysel Aslan
