2020-ci ilin ikinci yarısında “Qarabağ” yatağının işlənməsi üçün platformanın quraşdırılmasına başlamaq planlaşdırılır. Platformanın dayaq bloku artıq hazırdır. Bunun ardınca platformanın yuxarı blokunun dizaynı və quraşdırılması nəzərdə tutulur.
Platformada altı neft hasilatı və üç suvurma quyusu qazılacaq. Sualtı texnologiya əsasında yataqda daha iki qaz hasilatı quyusunun qazılması da nəzərdə tutulub.
SOCAR-ın sözçüsü İbrahim Əhmədov Baku TV-yə bildirib ki, bu bloku SOCAR-ın törəmə şirkəti “Bos Shelf” tikib. Platformanın üst hissəsi layihələndirilməlidir. Qarşıdakı illərdə həmin yataqda hasilat işlərinə başlanılacaq.
SOCAR və “Equinor” Xəzər dənizinin Azərbaycan sektorunda, Bakıdan 120 kilometr şərqdə “Qarabağ” neft-qaz yatağının kəşf olunması faktını təsdiq ediblər. İlkin dəyərləndirmələrə əsasən, yatağın neft ehtiyatı 60 milyon tondan çoxdur.
