Yaponiyada aparılan araşdırma yeriş sürətinə yaxın tempdə cəmi 10 dəqiqə qaçmağın beynin fəaliyyətini və əhval-ruhiyyəni yaxşılaşdırdığını göstərib.
Sherg.az xəbər verir ki, Tsukuba Universitetinin alimləri 24 sağlam gənc üzərində araşdırma aparıblar. İştirakçılar qaçış aparatında saatda 3-6 kilometr sürətlə 10 dəqiqə qaçıblar.
Tədqiqat zamanı iştirakçıların beynində oksigenlə zəngin qanın səviyyəsi xüsusi sensorlarla izlənilib. Müəyyən edilib ki, qısa müddətli yavaş qaçışdan sonra diqqət və özünənəzarət testlərində reaksiya müddəti əhəmiyyətli dərəcədə sürətlənib.
Həmçinin beynin əhval-ruhiyyə, qərarvermə və planlaşdırma proseslərində iştirak edən sol prefrontal korteks nahiyəsinə oksigenlə zəngin qan axınının artdığı müəyyənləşib. İştirakçılar məşqdən sonra özlərini daha ayıq, enerjili və yaxşı əhval-ruhiyyədə hiss etdiklərini bildiriblər.
Alimlər bu təsirin qaçış zamanı başın ritmik şəkildə yuxarı-aşağı hərəkət etməsi ilə əlaqəli ola biləcəyini düşünürlər. Araşdırmaya görə, bu hərəkət beyin toxumasını mexaniki şəkildə stimullaşdıra və məşq zamanı həzz hissinin artmasına təsir göstərə bilər.
Mütəxəssislər beyin və psixi sağlamlıq üçün fayda əldə etmək üçün ağır və yüksək intensivlikli məşqlərin mütləq olmadığını, bir neçə dəqiqəlik yüngül hərəkətin belə faydalı ola biləcəyini vurğulayıblar.
