"Bu 26 ildə test imtahanlarının çox böyük əhəmiyyətini gördük”.
Bu barədə "Sherg.az”a ali məktəblərə qəbulda test imtahanlarının ləğvinə münasibət bildirərkən bu imtahan metodunu Azərbaycan təhsil həyatına gətirən sabiq təhsil naziri, professor Firuddin Cəlilov deyib.
Professor test sistemini böyük çətinliklə tətbiq etdiklərini qeyd edib:
"Amma test imtahanı da islah olunmalıdır. Yeni mexanizm işlənməli, tələbələrin xeyrinə suallar asanlaşdırılmalı, iki mərhələli qəbul həyata keçirilməlidir. Bütün bunlar yerinə oturduqda qəbul imtahanlarını ləğv etmək lazımdır. Kim oxumaq istəyirsə, sənədlərini versin oxusun, kim istəmir "zorla gözəllik olmaz". İndiki məqamda DİM-in hansı mexanizmləri işləyib, tətbiq edəcəyi müəmmalıdır. Qurumun rəsmi modelləri hazırlanıb, tətbiqinə başlandıqda fikrimi bildirərəm”.
Qeyd edək ki, İki il sonra buraxılış və qəbul imtahanlarında yeni model tətbiq ediləcək”.
"Sherg.az"ın məlumatına görə, bunu Dövlət İmtahan Mərkəzi Direktorlar Şurasının sədri Məleykə Abbaszadə "ASAN Radio”ya müsahibəsində deyib.
M.Abbaszadə deyib ki, gələn ilki abituriyentlər axırıncı dəfə test formasında imtahan verəcəklər: "Gələn ilki imtahanlarda abituriyentlərdən daha da məsuliyyətli olmalarını gözləyirik. Çünki onlar sonuncu dəfə 26 ildir aparılan test şəkilində imtahan verəcəklər. Bu il kurikulum əsasında təhsil alan şagirdlər 2 ildən sonra XI sinifdə təhsil alacaq və onların biliyinin qiymətləndirilməsi fərqli formada keçirilməlidir. İki il sonra keçiriləcək buraxılış və qəbul imtahanlarında dəyişikliklər edilməsi nəzərdə tutulub”.
M.Abbaszadə bildirib ki, hazırda Təhsil Nazirliyi və Dövlət İmtahan Mərkəzi yeni imtahan modelləri üzərində müzakirələr aparır: "Yeni modellər düşünmüşük. Dəyişiklikləri, qərarlaşdırdığımız modeli sentyabr ayında ictimaiyyətə təqdim etməyi düşünürük. Hazırda ekspert və mütəxəssislər bu istiqamətdə işləri davam etdirir”.
Ayyət Əhməd
