"Məlumat üçün bildirim ki, prosedur qaydalarına əsasən 2018-ci ilin yanvar ayında AŞPA-nın prezidenti ve vitse-prezidenti vezifələrinə seçkilər keçirilmişdir. Seçkilər zamanı AŞPA-nın prezidenti vəzifəsinə İtaliyadan olan cənab Mişel Nikolleti və həmçinin AŞPA-da Azərbaycan nümayəndə heyətinin sədri mən, Səməd Seyidov da vitse-prezidentlər biri kimi seçilmişəm. Lakin cari il İtaliyada keçirilən son seçkilərdən sonra cənab Mişel Nikolleti İtaliya Parlamentinə üzv seçilə bilmədiyi üçün AŞPA-nın prezidenti vəzifəsindən istefa verməli oldu. Bu səbəbdən AŞPA-nın 2018-ci il yay sessiyasının ilk günündə AŞPA-ya yeni prezident və vitse prezident seçkiləri keçirilmişdir”.
Bunu Azərbaycanın Avropa Şurası Parlament Assambleyasındakı (AŞPA) nümayəndə heyətinin rəhbəri Səməd Seyidov yenidən AŞPA-nın vitse-prezidenti seçilməsi ilə bağlı İnsider.az-a şərhində bildirib.
"İyun sessiyası çərçivəsində Vitse prezidentlik üçün keçirilən seçkilər zamanı mənim vitse prezident kimi seçilməmə heç kim narazılıq bildirməmiş və mən yekdilliklə seçilmişəm. Bu vəzifəni də 2020-ci ilin yanvar ayına kimi layiqincə icra edəcəyəm”.
Xatırladaq ki, Avropa Şurası Parlament Assambleyasının cari ilin iyun sessiyasında Azərbaycan nümayəndə heyətinin rəhbəri Səməd Seyidov yenidən qurumun vitse-prezidenti seçilib.
Bundan başqa, Azərbaycan nümayəndə heyətinin iki yeni üzvü - Çingiz Qənizadə və Naqif Həmzəyev nümayəndə heyətinin üzvləri kimi təsdiqlənmiş, Elşəd Həsənov və Sevinc Fətəliyeva "Hüquq və Sosial Komitələr" tərəfindən məruzəçi kimi seçilmiş, Ülviyyə Ağayeva və Qənirə Paşayeva "Azad Demokratlar" siyasi qrupunun vitse-prezidenti kimi təsdiq edilmişdirlər.
