Tramp Ərdoğanla sonuncu telefon danışığında açıq bəyan etdi ki, Vaşinqtonun kürd terrorçuları dəstəkləməsi böyük səhvdir
Türkiyə Prezidenti Rəcəb Tayyib Ərdoğanla amerikalı həmkarı Donald Tramp arasında baş tutan telefon danışığı zamanı ABŞ tərəfi terrorçu YPG-yə silah verməyəcəyinə dair söz verib. Ərdoğan ABŞ-ın YPG-yə silah verməsi ilə bağlı narahatlığını Trampa çatdırdıqdan sonra Tramp qəti şəkildə deyib ki, bundan sonra qruplaşmaya silah verilməyəcək. Buna baxmayaraq, hələ də bəzi ölkələr PKK-ya maddi və silah dəstəyi verir.
Türkiyə mediasının məlumatına görə, 19 ölkə PKK-ya yardım göstərir. Silah verən ölkələr arasında Rusiya, Böyük Britaniya, Almaniya, İtaliya, Çin, İspaniya, İsrail kimi dövlətin adları qeyd olunur. İddialara görə, Serbiya PKK ilə birgə Balkanlarda narkotik ticarəti həyata keçirir. Hollandiya, Belçika, İsveçrə, Yunanıstan, Fransa, Danimarka isə terror təşkilatına siyasi dəstək verir. Suriya, İraq və Ermənistanın xüsusi xidmət orqanları isə PKK terrorçularına hərbi təlimlər keçməklə, silahlıların Türkiyə əleyhinə hazırlanmasında bilavasitə iştirak edirlər.
Proseslə bağlı "Şərq” danışan siyasi ekspert Natiq Miri deyib ki, Amerika PYD-ni Obama dövründən silahlandırmağa başlayıb. Onun sözlərinə görə, Donald Trampın hakimiyyətə gəlişindən sonra türkiyəli həmkarı Ərdoğanla aralarında isti münasibət formalaşdı. Ancaq buna rəğmən PYD ilə bağlı ilk tələblər nəticə vermədi:
"Tramp işə başlayandan bu yana başı qalmaqaldan qurtulmayıb. Bu yöndə Trampa çox ciddi təzyiqlər edilir. ABŞ-ın qanunverici orqanı olan Konqresdə də Türkiyə əleyhinə işləyən xüsusi qruplar var. Ona görə də prezident məlum qruplara güclü müqavimət göstərə bilmir. Lakin Tramp Ərdoğanla sonuncu telefon danışığında açıq bəyan etdi ki, Vaşinqtonun kürd terrorçuları dəstəkləməsi böyük səhvdir. Ancaq bu səhv onun yox, özündən əvvəlki administrasiyanın səhvidir. Düşünürəm ki, bu məsələdə Tramp səmimi olaraq Ərdoğana verdiyi sözü tutmaq istəyir. Amma onun sözünün üzərində durmağı bacaracağı hələlik sual olaraq qalır”.
Ekspertə görə, əslində Trampın açıqlaması obyektiv yanaşmadır. Çünki Suriyadakı son proseslər Amerikanın xeyrinə deyil:
"Soçidə Rusiya, Türkiyə və İran liderlərinin görüşü də göstərdi ki, burada uduzan tərəf məhz ABŞ-dır. Beynəlxalq ictimai rəydə də bu üçlük qazandı. Artıq hər bir ölkə fərqindədir ki, kürd silahlılarının perspektivi yoxdur. Bundan sonra həmin qruplaşmaya dəstək vermək daha çox nüfuzdan düşməyə səbəb olacaq. Bu mənada Tramp sözündə durarsa, əslində ABŞ-ın maraqlarına uyğun addım atacaq. Görünür, artıq rəsmi Vaşinqton anlayır ki, bölgədə Türkiyəsiz hərəkət etmək mümkün deyil. Bunun özü ziyanın yarısından geri qayıtmaqdır”.
İsmayıl
