"Kriptovalyutaların qiymətinin enib, düşməsi təbii haldır”
Bu sözləri "Sherg.az”a kriptovalyutaların qiymətinin 5 min ABŞ dolları dəyərində ucuzlaşmasından danışarkən iqtisadi-ekspert Fuad İbrahimov söyləyib.
Onun qənaətinə görə, bir müddətdir ki, kriptovalyutaların qiymətlərində ucuzlaşmalar müşahidə olunur:
"Bugünkü tarixdə aparılan tədqiqatlarda bitkoinlərin qiymətinin 6 min ABŞ dollardan aşağı enməsi də gözlənilir. Hətta sonuncu dəfə 2017-ci ilin noyabr ayının ikinci yarısında bitkoinlərin səviyyəsi 5.8 min ABŞ dolları səviyyəsinə qədər enmişdi. Ümumiyyətlə, bu kriptovalyutalar xüsusən də, bitkoinlər öz ticarət həyatını elektron ticarət platformalarında tapdıqdan sonra artıq bunun yuxarı və aşağı trendi ticarət əməliyyatlarından irəli gələn bir vəziyyətdir.
Təcrübədə kriptovalyutanın 90 faizə qədər ucuzlaşması müşahidə olunub. Sonradan mərhələli şəkildə qiyməti qalxıb. Burada aşağı və ya yuxarı trend əmələ gələcək və bunun ticarətini aparanların bir qisimi qazanacaq, bir qisimi də itirəcək. Müəyyən bir dövrdən sonra yenidən biz onun bəlkə bahalaşan bir formasını müşahidə edəcəyik. Bu standart bir rejimdir. Həmin rejimdə də öz dövriyyəsini, əməliyyatını aparmış olur. Burada heç bir qeyri-adi bir kataklizmin, geostrateji və siyasi bir məqam axtarmaq lazım deyil”.
Qeyd edək ki, dünyanın ən məşhur kriptovalyutası olan bitkoinin qiymətinin bu həftə, 2017-ci ilin oktyabr ayından bəri ilk dəfə 5 min ABŞ dollarından aşağı düşə bilər. Qonşu ölkənin maliyyə şirkəti - "Alpari"nin analitiki Vladislav Antonov bildirib ki, bitkoinin "qara gün"ləri Yaponiya və ABŞ-dan gələn xəbərlərdən sonra başlayıb. Belə ki, Yaponiyanın maliyyə xidmətləri agentliyi ölkənin 16 kriptovalyuta birjasında təhlükəsizliklə bağlı boşluqlar aşkarlayıb.
Rusiyanın ICG kriptovalyuta fondunun nümayəndəsi İqor Zartdinov isə deyib ki, birjaların təhlükəsizlik sistemlərindəki problemlər kriptovalyutalara inamı getdikcə azaldır. Müstəqil analitik Aleksandr Boyev isə qeyd edib ki, kriptovalyuta sayəsində əldə olunan "asan pullar dövrü" artıq bitib. Bitkoinin qiyməti ötən həftənin sonu ilə müqayisədə cüzi artaraq 6 147 dollara çatıb.
Kənan Eynuroğlu
